Moodle plataforman erraztasunez aritzeko ikastaroa da hau. Edozein ikasteredutarako baliagarria. Plataformari beldurra kendu, ezagun bihurtu, erabilpen-esperientzia hobetu eta eskaintzen dituen tresna batzuen aurkezpen-lanketa egingo da: elkarreragina sustatzeko (foroak, glosategiak, wikiak), komunikazioa errazteko (mezularia), edukien lanketa eta aurkezpenerako (liburua, galdetegiak, zereginak, H5P) eta ebaluaziorako eta ikaslearen monitorizaziorako (kalifikazio-liburua, jarduera osaketa). Baita motibazioa bultzatzeko ere (dominak, txostenak). Gainera, Moodletik kanpoko tresnak txertatzeko aukerak aztertuko ditugu. Azkenik, audio eta bideo formatuen oinarrizko edizioa landuko dugu.

Ikastaroa parte-hartzaileei aldi baterako laguntza-estrategiak emateko diseinatuta dago, ikasleek aukera izan dezaten euskaraz duten gaitasunetik abiatuta (erabateko hasiberriak barne) xede-hizkuntzan autonomia eta hizkuntzaren jariotasun handiagoa lortzeko modu eraginkorragoan. Ikastaroak teoria eta praktika eskaintzen ditu, eta ikasitakoa beren testuinguruetan aplikatzeko aukera ematen die irakasleei. Ikaskuntza pertsonalizatzea eta metodologiak komunikazio-jardueretara egokitzea ditu helburu, eta ikastaroa erabilgarria da beren gaitasun pedagogikoak eguneratu eta ikasleen potentziala hizkuntzen ikaskuntzan maximizatu nahi duten irakasleentzat.

Ikastaro hau euskara-eskoletan bitartekotza nola txertatu (bai irakas-, bai ebaluazio-prozesuetan) aztertu nahi duten irakasleei dago zuzenduta, eta komunikazio-modu horrek euskararen irakaskuntzarako dituen aukerak aztertuko dira bertan. Era berean, euskara-eskoletan bitartekotza lantzen hasita dauden irakasleen gaitasun didaktikoetan ere sakondu nahi da. Ikastaroa bitartekotzaren ikas-irakas prozesuetan ardaztuko da, baita ebaluazio formatiboaren prozesuetan ere, eta EEMBaren komunikagaitasun-maila guztietan. Azkenik, bitartekotza ebaluazio-prozesu egiaztatzaileetan nola txertatu ere aztertuko da, 2024an C2 maila egiaztatzeko azterketetan txertatu baitu HABEk, eta arreta berezia jarriko da B2-C1 mailetan.

Ikastaro honetan, Moodle ikasgelari ahalik eta etekin handiena nola atera ikusiko dugu: modu praktiko eta progresiboan, eta jardun biko eredurako hizkuntza-ikastaro erakargarri eta dinamiko bat diseinatzen joango gara. Alderdi asinkronoa (Moodle gelan dagoena) eta alde sinkronoa (aurrez aurreko gelan) hizkuntzen irakaskuntzan nola konbinatu ikasiko dugu adibide praktikoekin.

Ahoskeraren eta prosodiaren oinarrizko kontzeptuetan bat etorrita, euskaltegietako ECPetan agerrarazi eta eguneroko ataza eta jardueretan landu eta ebaluatzeko proposamena egingo da. Praktikarako jarduera ugari emango dira aditzera, baita etorkizunerako erronkak ere.

Lucila María Pérez Fernándezek Clases inclusivas de lenguas extranjeras liburua argitaratua du 2024an. Liburu honek hizkuntzen irakaskuntzan inklusioak duen garrantzia aztertzen du, ez soilik printzipio etiko gisa, baizik eta estrategia eraginkor moduan, ikasle guztiek ahalik eta gaitasunik handiena lor dezaten, beren maila edozein delarik ere. Laugarren kapituluak hizkuntzen irakaskuntza inklusiboarekin lotutako metodo, estrategia eta printzipio zehatzak aztertzen ditu, eta jarduera-adibide batzuk proposatzen ere bai.

Nafarroako liburutegiak erakusketa didaktiko bat antolatu du martxoaren 10etik maiatzaren 10era bitarte, eta gero, Nafarroako beste liburutegi publiko batzuetara joango da erakusketa hori.

'Paradigmas lingüísticos en la enseñanza y aprendizaje de lenguas' liburuaren seigarren kapituluaren izenburua honako hau da: “Didactica de las actividades lingüisticas implicadas en el aprendizaje de lenguas”. EEMBaren Liburu osagarriko komunikazio-moduak lantzen dira ikuspegi integratu batetik. Seigarren kapituluak hizkuntza-trebetasunen ikuspegi integratua eskaintzen du, irakasleei teoria eta praktika uztartzen laguntzeko.