Irakurketa Erraza formatua irakurketa- eta ulermen-zailtasunak dituzten pertsonei zuzentzen zaie (herritarren % 30i). Zailtasun horiek, aldi baterakoak edo iraunkorrak izan daitezke faktore ezberdinak gorabehera (analfabetismo funtzionala, desgaitasun intelektuala, dislexia, nahasmendua…).

Irakurketa Errazari esker, ikasleentzako egokiak eta ulergarriak diren informazio eta ikas-materialak sor daitezke eta, hala, ikaslearekin arlo guztietan modu iraunkorrean komunikatzeko gaitasuna eskuratu, testu-mota ezberdinak oinarri: ikasketarako testuak, informazio- eta administrazio-testuak, aisialdirako testuak… 

Ikastaroan, Irakurketa Erraza tresna zer den eta zertarako balio duen ezagutzera emango da, eta Irakurketa Erraza formatuan idazteko teknikak zein irizpideak landuko dira. Mota askotako adibideak erakusteaz gain, ariketa eta praktika ezberdinen bidez, parte-hartzaile bakoitzaren errealitatean ezarri eta erabili ahal izateko moduko testuak landuko dira.

Ikas-irakas prozesuan inplikatutako irakasleek euskaltegirako helburu eta helmugak erdiesteko, zenbait harreman garatzen dituzte (ikasleekin, lankideekin, euskara-teknikariekin eta beste hainbat eragilerekin) eta, sarritan, zailtasunak, gatazkak eta emozio ezberdinak sortzen dira prozesu zein harreman horietan.

Harreman horietan komunikazioa eta erlazioa bera elikatzeko, lagungarria da estrategia, baliabide eta lan-tresna zehatzak eskuratzea, euskara-irakaslea gai izan dadin ikas-irakas egoera konplexuetan erabakiak hartzeko, emozioak erregulatzen ikasteko, gatazkak kudeatzeko eta ikasgelan giro egokia sortzeko.

Ikastaroaren helburua da euskara irakasteko prozesuan norberaren emozioak identifikatzen jakitea, eta besteenak ulertuz eta komunikazio enpatiko nahiz asertiboaren bidez, sor daitezkeen gatazkak modu egokian kudeatzen ikastea.

Euskaltegietako irakasleei zuzendutako ikastaro praktikoa. Adimen artifizialeko tresnak euskararen irakaskuntzan nola erabili aztertuko da bertan, arreta berezia jarriz ikasleen inklusioan eta materialen irisgarritasunean.

Ikastaroan, chatGPT eta Gemini bezalako tresna orokorrak aztertu eta baliatzeaz gain, euskaraz lan egiteko berariaz sortutako beste hainbat baliabide ere landuko dira: Elia, Itzuli, Aditu, Kimu eta Latxa, esaterako.

Ikasgela eremu irisgarriagoak, parte-hartzaileagoak eta ikasleen benetako beharretara egokituak diseinatu nahi dituzten euskara-irakasleei zuzendutako ikastaro praktikoa. Ikaskuntzaren Diseinu Unibertsaletik (IDU) eta maila askotariko irakaskuntzaren berezko estrategietatik abiatuta, ondorengoak landuko dira: nola planifikatu eskolak modu malguan, nola sortu maila desberdinetarako egokiak diren jarduerak eta, azkenik, nola aplikatu ikasle guztien ulermena, parte-hartzea eta aurrerapena erraztuko dituzten laguntzak.

Ikastaroak plangintza, irakaskuntza bereizia, lan kooperatiboa, taldekatzeen antolaketa eta atzeraelikadura pedagogiko doitua lantzeko funtsezko ikuspegiak biltzen ditu. Ikuspegia oso praktikoa izango da: lehen egunetik ikasgelara eramateko moduko materialak, jarduerak eta plangintzak diseinatuko dira. Ikastaro hurbila, praktikoa eta aplikagarria, ikasgela eremu irisgarriagoa, dinamikoagoa eta parte-hartzaileagoa bihurtu nahi duten irakasleei zuzendua.

2026ko udako prestakuntza-ikastaroetan izena emateko epea martxoaren 16tik apirilaren 15era egongo da zabalik.

Hemendik aurrera, e-Berrikaria ez da foroko mezu baten bidez iritsiko harpidedunen helbide elektronikora, banaketarako sistema baten bidez baizik. Orain arte harpidetuta egon direnek ez dute ezer egin behar. Harpidedun izan nahi dutenentzat, berriz, izena emateko prozesua erraztu egin da.

GOI institutuak doktoregaientzat antolatutako formazioen barruan, “Euskarazko komunikazio egokia: euskara idatziaren zuzentasuna” izeneko online ikastaroa antolatu zen 2025eko ekainaren 5etik 18ra. Izan ere, komunikazio akademikoan testu espezializatuak sortzen dira eta horrelakoek badituzte berezitasun batzuk; besteak beste, hizkuntzaren kode estandarra eta estilo zaindua erabili ohi dute. Gurean, euskara batuak ekarri du estandarra, eta, beraz, komunikazio zientifikoan sortzen diren testuen zuzentasuna bermatzeko Euskaltzaindiak eman dituen arauak, gomendioak eta irizpenak (morfologikoak, sintaktikoak, ortografikoak, onomastikoak, hiztegikoak) aplikatu behar dira.

Ikastaroaren helburu nagusiak hauek izan ziren: esparru akademikoan kalitatezko testuak sortzea; lan akademikoen ezaugarriak aintzat hartuta euskarazko komunikazio akademikoan euskara idatziaren zuzentasuna bermatzea eta sortzen diren testuak zuzenak, egokiak eta ulergarriak izatea.

https://doi.org/10.54512/BONO8562

Aitzol Astigarraga adituak "Adimen artifiziala euskararen irakaskuntza inklusiboan" web-mintegia eskainiko du, HABEk antolatuta, martxoaren 18an.