2025eko udako prestakuntza-jarduerak

Oharra: *EHUren Uda Ikastaroak Fundazioaren eta HABEren arteko lankidetzari esker antolatutako "Adimen artifiziala helduen euskalduntzean" ikastaroan izena emateko epea, berriz, maiatzaren 8tik aurrera zabalduko du EHUren Uda Ikastaroak Fundazioak.

"Adimen artifiziala (AA) erabiltzeko irizpideak" web-mintegia

Egoitz Etxeandia adituak "Adimen artifiziala (AA) erabiltzeko irizpideak" mintegia eskainiko du, HABEk antolatuta. Mintegi honetan, euskara-eskolak ematean AA erabiltzeko irizpideak eta zenbait erabilera-modu aztertuko dira. Mintegia bi saiotan banatuko da: 1. Saioa (2025/01/30). Oinarrizko ezagutza: instrukzio praktikoak, promptak nola egin, aluzinazioak, sesgoa, alderdi etikoa... 2. Saioa (2025/03/06). Bigarren hizkuntzen irakaskuntzarekin lotutako gaiak: klaseen planifikazioa, material didaktikoa egin, ebaluazio-errubrikak, irudiak...

"Inteligencia artificial y educación: construyendo puentes" liburua (Amaia Arroyo Sagasta, koordinatzailea)

Irakasle, ikertzaile eta profesionalei zuzendutako liburua da 2024ko hasieran argitara emandako honako hau; izan ere, hezkuntzaren munduan ere badu eraginik adimen artifizialak eta AAk ikasi eta irakasten dugun modua eralda dezake. Zortzi atal ditu liburuak. Funtsezko gaiei erreparatzen zaie, bakoitzean arlo bati helduta, baina, aldi berean, garapen bati jarraikiz. Atalek, gainera, badute ezaugarri komuna: galdera gisa planteatu dira, eta halakoxea dute izenburua. Are, galdera gehiago sortaraztea ere badago liburuaren xede gisa. Oinarrizko erreferentziak eskaintzen dira testuan zehar, era askotakoak eta ez soilik bibliografia.

1249 - Moodle ezagutu: erraz ikasi eta gozatu prozesuan

Moodle plataforman erraztasunez aritzeko ikastaroa da hau. Edozein ikasteredutarako baliagarria. Plataformari beldurra kendu, ezagun bihurtu, erabilpen-esperientzia hobetu eta eskaintzen dituen tresna batzuen aurkezpen-lanketa egingo da: elkarreragina sustatzeko (foroak, glosategiak, wikiak), komunikazioa errazteko (mezularia), edukien lanketa eta aurkezpenerako (liburua, galdetegiak, zereginak, H5P) eta ebaluaziorako eta ikaslearen monitorizaziorako (kalifikazio-liburua, jarduera osaketa). Baita motibazioa bultzatzeko ere (dominak, txostenak). Gainera, Moodletik kanpoko tresnak txertatzeko aukerak aztertuko ditugu. Azkenik, audio eta bideo formatuen oinarrizko edizioa landuko dugu.

Adimen artifizialaren aukerak (GIELE 2024, Cadiz)

Azaroaren 15ean eta 16an GIELEren VI. Jardunaldiak egin dira Cadizen. Aurtengo leloa hauxe izan da: “Ebaluazioaren kontzeptu giltzarriak egungo testuinguruan”, eta bertan, hizkuntzen ebaluaziogintzan gabiltzanon eguneroko kezka diren gai-alorrak lantzeaz gain, Adimen Artifiziala eta Behar berezietarako egokitzapenak izan dira aurtengo langai nagusiak.

"(Enseñar a) leer y escribir con IA generativas" artikuluaz (Daniel Cassany)

Adimen artifizialaz artikulu berria plazaratu du Daniel Cassanyk, ohi duen estilo argiari jarraikiz. Azkenaldi honetan eman dituen hiru hitzalditan adierazitakoa hartu oinarri gisa. Oraindik behin betiko bertsioa ez dagoen arren, eskura dago testua Sarean.

"Language Education in Digital Spaces: Perspectives on Autonomy and Interaction" liburua (Fuchs, C., Hauck, M., eta Dooly, M.)

Teknologiak gure bizitzako alderdi guztietan duen eraginak hizkuntzen irakaskuntza ulertzeko eta praktikan jartzeko modua ere eraldatu egin du; online-irakaskuntzan aldaketa eragin duenez, eremu digitaletan ikaslearen autonomia sustatzeko beharra nabarmendu egin da. Gaur gomendatzen dugun liburua ekarpen egokia izan liteke. Izan ere, material asko eskaintzen baitu ikaslearen autonomiaren harreman dinamikoari, hizkuntzen irakaskuntzari eta teknologiari buruzko hausnarketarako; gainera, ikuspegi pedagogikoki aplikagarri eta teorikoki aberatsak ematen dizkie hartzaileei, hau da, hizkuntza-irakasleei, ikertzaileei, irakasle-prestatzaileei, materialen/curriculumen diseinatzaileei eta ikasleei.

Adimen artifizialaren erabilera EAEko helduen euskalduntzean

Adimen artifiziala (AA) gero eta hedatuagoa dago gizarteko esparru guztietan, eta euskararen irakaskuntza ez da salbuespena. EAEko helduen euskalduntzean ari diren irakasleei AAri buruz bidalitako galdetegi baten emaitzak aztertuko dira lan honetan. Emaitza nagusiek erakusten dute AAren erabilera ez dagoela oso hedatua irakasleen eguneroko lanean, nahiz eta datozen urteetan euskararen irakaskuntzan eragina izango duenik ez den zalantzan jartzen. Testuinguru horretan, AAren hedapena kezka sortzen duen gaia da irakasleen artean.