Nerea Mendizabal komunikazio ez bortitzeko hezitzaileak egunerokoan adimen emozionala lantzeko bi gako proposatu ditu bideo labur honetan eta baita praktikan jartzeko ariketa bat ere.

"FormacionELE" webguneko bi testuk hizkuntza-antsietatearen arlo desberdinak aztertzen dituzte: ahozko jardunean agertu ohi den segurtasun-falta eta entzumenaren ulermenean sortzen den blokeoa. Bi kasuetan, egileek azpimarratzen dute zailtasunen jatorria ez dagoela beti hizkuntza-ezagutzan; sarritan, dakitena erabiltzeko unean sortzen dira oztopoak. Horri aurre egiteko, irakaslearentzako zenbait proposamen praktiko egiten dituzte, hala nola komunikazioaren eraginkortasuna lehenestea, akatsa normaltzat hartzea, aurreikuspenak eta hipotesiak lantzea edo ikasgelan konfiantzazko giroa sustatzea. Ikuspegi hori bat dator helduen euskalduntzearen eremuan aspalditik landu izan diren gogoetekin eta HEOCak ikasprozesuaren estrategiei buruz egiten duen planteamenduarekin.

Hizkuntza bat ikasteak emozio askoren atea irekitzen du, eta horien artean antsietatea da ohikoenetako bat. Beldurrak, frustrazioak edo segurtasun faltak ikaslearen komunikatzeko gogoa murriztu dezakete, batez ere ikasgela giro seguruan oinarritzen ez bada. Horregatik, ezinbestekoa da irakasleek eta ikasleek elkarrekin lantzea antsietatea arintzeko estrategiak, bai maila fisiologikoan, bai psikologikoan, ikasprozesua atseginagoa eta eraginkorragoa izan dadin.

"Erresilientzia" kontzeptua gero eta gehiago entzuten hasiak garen garaiotan, gaitasun hori irakaskuntzan landu eta aplikatzeko zenbait gako eskaintzen da sarrera honetan. Izan ere, erresilientzia landuz gero, gatazkak era eraginkorrean konpondu litezke, ikuspegi orekatua, elkar ulertzea eta adostasuna sustatuz.

Ikastaro honen helburu nagusia da gatazkei buruz hitz egitea. Gatazkak ezinbestean gertatzen direnez, gatazka-motak ezagutzea eta gatazka baten aurrean har daitezkeen jarrerak zeintzuk diren jakitea; gatazkaren bat eta horrek sortzen dituen emozioak kudeatzeko eman beharreko urratsak zeintzuk diren ikastea.

“La alfabetización afectiva en la enseñanza de lenguas: la voz de los adultos migrantes” artikulua Mª Carmen Fonseca Mora Huelvako Unibertsitateko irakasleak argitaratu du ‘Bellaterra: journal of teaching and learning language and literature’ aldizkari espezializatuaren 2024ko 17. zenbakian. Artikulu horretan, harrera-herriaren hizkuntzan irakurtzeak pertsona heldu migratzaileen bizitzetan duen eragina aztertzen da. Helburu nagusia da irakurketa-prozesuaren gainean hausnartzea, hezkuntza eraldatzeko funtsezko elementu gisa. Gure gizarte multikultural eta multimodalean, bertako migratzaile helduei hizkuntza hobeto irakatsi dakieke alderdi afektiboei erantzunez, alfabetatze afektiboa ikasgeletan aplikatzeari buruzko ikerketek erakusten dutenez. Horrez gain, hizkuntzen irakaskuntzan txerta daitezkeen zenbait jarraibide eta praktika on ere ematen ditu.

"Enseñanza de idiomas e inclusión. La discapacidad sensorial en el aula" liburuan, zentzumen-desgaitasuna duten pertsonei hizkuntzak nola irakatsi aztertu du Beatriz Reverter irakasleak.

Aldaketa sozio-kulturalek eta gizartearen zahartzeak nolabaiteko interesa piztu dute adinekoen hezkuntzaren esparruan. Nolanahi ere, adinekoen hezkuntzaren gaiak ez du behar besteko arretarik izan oraindik. Horregatik, "Insights into Senior Foreign Language Education" liburuak giza zahartzearen prozesuari eta bizialdi osoko ikaskuntzaren filosofiari lotutako gai batzuk jorratzen ditu, arlo horrek ezinbestean ezagutza eta arreta handiagoa eskatzen duela iritzita.