Didaktika-foroa

Sormena, berrikuntza eta aniztasuna

Sormena, berrikuntza eta aniztasuna

by Iñaki Murua -
Number of replies: 1

"Creatividad, innovación y diversidad en la enseñanza del español como LE/L2" monografikoa eman du argitara Leongo Unibertsitateko argitalpen-zerbitzuak, Creative Commons lizentziapean.

Esther Álvarez Garcíak eta Milka Villayandre Llamazaresek editatu duten argitalpenean 45 atal daude, arestian aipatutako hiru kategoriatan sailkatuta: sormena eta motibazioa, berrikuntza eta aniztasuna. Batzuk oso testuinguru jakinetakoak dira, baina beste batzuk geurerako ere baliagarriak izan daitezke. Halaber, egileen artean badaude ezagunak ditugunak, hala nola Susana Llorián, Vicenta González, Francisco Javier López, Vanessa Ruiz edota Lola Torres.


Erreferentzia bibliografikoa:

Álvarez García, E., eta Villayandre Llamazares, M. (2023). Creatividad, innovación y diversidad en la enseñanza del español como LE/L2 . Universidad de León. Servicio de Publicaciones. https://hdl.handle.net/10612/17469

In reply to Iñaki Murua

Er: Sormena, berrikuntza eta aniztasuna

by Ainara Maya Urroz -
Eskerrik asko, Iñaki... monografiko interesgarri horrek ene esperientzia oroitarazi dit, bai hizkuntza-ikasle gisa eta bai hizkuntza-irakasle gisa ere.

Alemana ikasten lagundu zidan 1996an sormenak. Izan ere, alemana deus ere jakin gabe hartu nituen aleman-klaseak 20 urte nituelarik Alemanian urtebetez eta egunero, eta hizkuntza hobetzeko eta ikasten segitzeko motibazioa sormenean oro har, eta zehazki, poesian topatu nuen. Marlene Hörmann poetisa aleman ezezagunaren poema-liburu bat eskuratu zidaten ("Ein leises Lied"), eta kantu isil baten modura, tantaz tanta sartu zitzaidan alemana ene barnean maitasunez eta goxoki. Jolas gisa poema horiek euskaratzen nituen eta berriak sortu ere bai, bai alemanez bai euskaraz, eguneroko bat ere idazten nuen alemanez gauero, eta horrela, eguneroko aleman-eskolez gain, eta familia alemaniarreko egonaldiaren laguntzaz, ikasturte batez 0tik B1 maila batera iritsi nintzen!

Euskara irakasteko orduan, berriz, euskara ikasteko motibazioa pizten lagundu nuela uste dut norberaren sormena lantzean, bai Txekiako unibertsitateko euskara-ikasleen artean, bai hainbat euskaltegitako ikasleen artean nahiz eskola zenbaitzuetako DBHko gaztetxoen artean. Are, euren sormen-lana HATSAREN POESIA liburuan argitaratzeko aukera eman nienean, hori poza!

Poesia-tailerren dinamika
  • Klase-ordu batean, irakasleak, argazki batetik abiatuta, ikasle bakoitzari eskatzen dio bere sentsazioak, pentsamenduak edota sentimenduak idazteko eta gero irakasleak saiatu behar du talde-olerki bateratu bat osatzen. 
  • Beste klase-ordu baterako ideia poesia-tailerra antolatzea da taldeko mailako euskarazko gramatikaren atal bat (adib. baldintzazko aditzak) oinarri hartuta, eta horrela, ikasle bakoitzari bere poema idazteko eskatzen zaio.
Beraz, euskara-irakasle, sormena landuz irakatsi nahi baduzue edota poesia gustuko baduzue, animatzen zaituztet horretarako denbora hartzera klase-ordu batean eta klasetik kanpo ere bai. Hori eginez gero, datorren urteko HATSAREN POESIA liburuan zuen sormen-lana argitaratuko litzateke. Edozein zalantzetarako edo poesia-tailer bat antolatzeko laguntza behar baduzue, idatzi lasai honako helbide elektronikora: hatsarenpoesia@gmail.com.

Urteberri on guztiei!


Hona hemen datorren urterako HATSAREN POESIAren deialdiaren informazioa:


Eguberri on, olerkari maitea:

Datorren urteko 26. "Hatsaren Poesia" olerki-bilduma liburua elkarrekin sortzea proposatzen dugu beste behin ere, eta datorren urtekoa magikoa egin nahi genuke. Urruñako Loraldiberri eta Durangoko azokaren ajea dela eta, berantetsi naiz datorren urterako deialdia egiteko, baina azkenean hona hemen gonbidapena.

Beti bezala, itxaropen handi batekin pentsatzen dugu olerkari aunitzen oihartzuna ukaitea datorren urteko HATSAREN POESIA liburuan, eta posta elektroniko honekin batera, oroitu nahi dugu datorren urteko sar-hitza aspaldiko hatsakide dugun Joseba Aurkenerenari egokitu zitzaiola zoriz, eta datorren urteko liburuaren azalerako irudia norena izango den erabakitzeke dagoela; beraz, norbaitek proposamenik balu, bidal diezagula guri.

Zuei denoi ere parte hartzeko gonbidapena zabaldu nahi dizuet, eta honako hau galdegiten dautzuegu bisurte magikoa izanen dugun datorren urterako:

  • Bizpahiru olerki gehienez bidal diezagukezu, eta horrekin batera biografia labur bat, gehienez ere lauzpabortz lerro.
  • Zure aurpegiaren argazki bat ere nahi genuke.

Azken epea olerkiak bidaltzeko 2024ko urtarrilaren 29a izanen duzue, eta bi modu duzue horretarako:
  • Helbide elektroniko honen bidez: hatsarenpoesia@gmail.com
Baldintzarik gabe eta zentsurarik gabe olerki guziak usaian bezala, 2024ko bedatsean edo udaberrian argitaratuko ditugu, ontsalaz apirilaren hasieran.

Zure inguruan diren olerkari idazleei mezu hau ZABALDU, otoi! Denontzat tokia izango da liburuaren barnean!

urtats
Tags: