Euskal Herriko Agintaritzaren Aldizkarian azaldu zen 1987ko urtarrilaren 28an, aurtengo 17. zenbakian, helduen euskalduntzearen lehenengo zortzi urratsetako edukiak eta ebaluaketarako oinarrizko irizpideak zehazten dituen Kultura eta Turismo Sailburuaren Agindua. Agindua helduen euskalduntzearen programagintzan aurrerapauso berria denez, ZUTABEren orrialde hauetara dakargu osorik, eranskinari buruzko zenbait argibiderekin batera. Argibideok, jakina, ez diote aginduari ez ezer eransten, ez ezer kentzen.

Iazko esperientziari jarraiki, aurtengo 86/87 ikasturte honetan ere HABEren Bizkaiko Ikuskatzailetzak zenbait Udal-Euskaltegirekin batera «Aurten bai» lemapeko alfabetatze kanpainari ekin zion irailean. Horrela, iaz Gernikalde eta Mungialdean egina beste eskualde batzuetara ere zabaldu du oraingoan, Arrigorriaga, Ugao, Galdakao, Sopela eta batik bat Durangaldera.

Artikulu honen helburua Kanadako eskola eta unibertsitateetan egindako saiaketa interesgarri batzuk aurkeztea eta aztertzea da. Baita ere, hango esperientziatik atera ditzakegun ondorioak ikertu nahi ditut. Hain zuzen ere, Kanada zuen aztergai nagusi aldizkari honen lehenengo aleak. Hala ere, ale hartan esandakoa eta nik oraingo honetan arakatuko dudana oso gauza ezberdinak dira.

ELT materialetan ari dira azaltzen benetako hizkuntzaren erabileraren bereizgarriak dituztenak, nahiz eta oraindik ere material horiek ez «benetakoak» izateagatik berezi. Bide luzea dago ibilkizun entzunezko materialgintzan, harik eta benetako erabileraren bereizgarriak bereganatu arte; baina oro har baliagarritzat jotzen da behintzat bereizgarri horiek ikasleei helaraztea.

Ez da, ordea, hain oro har onartzen benetako entzunaldiaren esperientzia hizkuntzaren bereizgarri batzuk entzutea baino gehiago denik: entzuteko jarduera mota asko suposatzen du, eta hauek oso gutxitan erabiltzen dira ELT materialetan.

lrakasle askok erruduntzat jotzen dute euren burua ikasgelan diktaketa erabiltzen dutela onartzerakoan. Mario Rinvolucrik ohiko diktaketaren barruan ikasleari bere ekarkin pertsonala ahal bideratuko liokeen hurbilketa interaktiboa iradokitzen du.

Bada joko bat, denborapasa erabilia, askoren artean jo ka daitekeena eta euskal aditza lantzeko ere balio dezakeena. Neska-mutilekin baliagarri gertatu zitzaigulako dakargu hona, helduekin ere hala gerta dakigukeelakoan. Jokoa bera azaltzen hasiko gara, eta ondoren euskal aditzarekin nola erabili erakutsiko dugu.

Geure euskararen programazioan mintzaira lantzeko ariketen arloan kokatzen dugu abestia, lamina mutuekin, pasadizoekin, poematxoekin, irakurgaiarekin, marrazki ezkutuarekin eta nahas-mahasekin batera. Beraz, edonor kontura daiteke bai idatzizko, bai ahozko beste mikrohizkuntzarako edo makrohizkuntzarako ariketa analitikoen eta hedagarrien ondoren nolabait gozamenaren eta plazer estetikoaren munduan sartzen garela ikastunitatearen azken arlo honetan.

Edozein hizkuntz item berri aurkezteak nolarebait item hori gorputz handiagoa den hizkuntzatik isolatzea esan nahi du. Zein hizkuntz eduki irakatsi behar den aukeratzea Syllabusari buruz erabakiak hartzea da, eta Syllabusa gehienetan irakasleak ez beste norbaitek ezarria izaten da. Irakasleari dagokio garrantzia zeri eman erabakitzea eta ikasleari behar hainbat ariketa egiteko aukera ematea.

Irakasleak baditu bere esku bere jardueran aurkezpena eta lanketa erraztuko dioten zenbait teknika eta metodo eta hauen sorburu diren eta beroietan eragina duten faktoreak, ikasleari zein irakasleari dagozkienak; horiek eta hainbat hizkuntz sistema aztertzen ditu artikulu honek.