Mugikorraren erabilera pedagogikoa ikasgelan izan zen apirilean Maite Goñik emandako web-mintegi baten izenburua; KoLaborategiak antolatu zuen, Humanitate eta Hezkuntza Zientzien Fakultateko Gizarte Digitalerako Hezkuntza eta Komunikaziorako laborategiak. YouTuben dago grabaketa, Mondragon Unibertsitatearen kanalean hain zuzen. Orduan esandakoak laburbildu eta iruzkindu ditugu sarrera honetan.

Mondragon Unibertsitateko irakaslea da egun Maite Goñi (@euskaljakintza) eta KoLaborategiako kide. Besteak beste, bertako fakultate ezberdinetako irakasleen formazioan dihardu tekno-pedagogia esparruan. Ingurune digitala, Internet, teknologia eta euskara hizpide hartuta, hainbat hedabidetan hartzen du parte. Halaber, Eusko Jaurlaritzaren Euskararen Aholku Batzordeko kide da eta Ingurune Digitalean Euskara Sustatzeko Batzorde-Atalaren zuzendari. Geurean ere ezaguna dugu; 2016/2017 ikasturte hasierako ekitaldi akademikoan hizlari izan genuen. Teknologiaren aukerak hizkuntzen irakaskuntzan izan zen orduan landu zuen gaia. 

Mugikor bidezko ikaskuntzaren definiziotik abiatu zen: teknologia mugikorra edozein unetan eta edozein tokitan ikasteko baliatzea. Eta "mugikor" horren barruan, smartphoneak, tabletak eta abar sartu zituen. Beste erabaki bat izango da edozein horiek mugatzea. Prozedura metodologikoak eta helburu didaktikoak zeintzuk diren argi izan behar dela azpimarratu zuen behin baino gehiagotan, eta horren arabera hautatu teknologia. Suitzar labanaren irudia baliatu zuen metafora gisa, erabilera anitz izan ditzakeelako mugikorrak baina desegokiak ere tartean egon daitezkeelako.

Zertarako erabil daitekeen azaldu zuen: kontzeptu bat errazago ulertzeko, ikaskuntza pertsonalizatzeko, aniztasunari erantzuteko, ikaskuntza autonomoa, aktiboa eta jarraitua sustatzeko, eduki kontzeptualak birpasatzeko, ebaluaziorako (e-portfolio batera ebidentziak igotzeko, esaterako), ikaskuntza-komunitatea sortzeko, ikasleak motibatzeko... Teknologiarekin lotura duten beste kontzeptu batzuei buruz ere mintzatu zen: ikasgela iraulia edo flipped classroom,  Proiektuetan Oinarritutako Ikaskuntza... Erakunde hezitzaile batean mugikorren erabilera aurrera eramateko dekalogo bat aurkeztu zuen.

Hitzaldian zehar, baliabideak aipatu eta azaldu zituen. Hona hemen batzuk:

• Kahoot eta Quizlet bezalako erremintak.
• Aulaplaneta.com-en Proiektuetan Oinarritutako Ikaskuntzari buruz dagoen infografia.
• TPACK eta SAMR ereduak.
• mschools toolbox.
• Errubrikak:
  • Guía para evaluar la calidad de apps móviles educativas (jatorrizkoa hemen; Maite Goñik itzulpen egokitua aurkeztu zuen).
  • Student app review rubric.
  • Samr student choice matrix.
• Dokumentuak (sakondu nahi duenarentzat)
  • Directrices de la UNESCO para las políticas de aprendizaje móvil.
  • Los dispositivos móviles en educación y su impacto en el aprendizaje.

Web-mintegia ez zen helduen euskalduntzera bereziki zuzendua izan, eskolei zentzu zabalean baizik. Adibidez, gurasoen inplikazioa agertu zen hitzaldian zehar eta galdera-erantzunetan. Hala ere, badaude gure esparrurako hainbat ideia baliagarri, besteak beste, helduak diren heinean ikasleen parte hartzea aplikazioak aztertzeko.

Hortaz aparte, Irakasbilen dauden edukiekiko loturarik badago, hala nola Hizpide aldizkariaren 85. zenbakiko artikuluak (mugikorren inguruko gaiak izan ziren nagusi) edota TPACK ereduari buruzko sarrera.

Erreferentzia bibliografikoa: