LdeLengua podcastaren 158. atalean, Francisco Herrerak Cristina Urbizu Pérez elkarrizketatzen du, Euskal Herriko Unibertsitatean Filologia Hispanikoan lizentziaduna eta ibilbide luzeko espainiera-irakaslea. Cristinak bere lan-ibilbidearen zati handi bat gaztelania atzerriko hizkuntza gisa irakasteari eskaini dio, bereziki etorkinekin aritu da, eta gaur egun ELEko irakasleentzako prestakuntza-ikastaroen koordinatzailea da.

Elkarrizketan zehar, Cristina Urbizuk, oro har, literaturari buruz eta, zehazki, mikro-narrazioaren formatuari buruz hitz egiten du, baita atzerriko hizkuntza gisa espainierako ikasgelan duen aplikazioari buruz ere. Genero horrek bigarren hizkuntzen didaktika aberastu dezakeela nabarmentzen du, ikasleen kultura- eta hizkuntza-ulermena sustatzean.

Bestalde, ingurune digitalean nola egokitu daitezkeen dinamika horiek gaineratzen du, WhatsApp, Flip edo Padlet bezalako plataformak erabiliz, online-ikaskuntza interaktiboa eta kolaboratiboa errazteko. Esate baterako, Cristina Urbizuk Andres Neumanen “Felicidad” (Zoriona) izeneko mikro-kontakizuna B1-B2 mailetan baliatu ohi du, eta ikasleei eskatzen die zorion-une bat erakusten duen argazki bat eta testu bat partekatzeko ikastaldearen WhatsAppean. Literatur lehiaketak ere antola daitezkeela proposatzen du adituak, eta Flip plataformaren bidez elkarri eragiteko bideo laburrekin ikasleek bata bestearen atzetik kontakizunak sor ditzakete; hau da, ikasle batek bere narrazioa kontatzetik bukatzerakoan, hurrengo ikaskidearen izena esango du, eta aipatua izan den pertsona horrek aurreko narrazioaren azken esaldiarekin hasiko du bere kontakizuna; eta horrela, bata bestearen segidan, denek parte hartzen dute.

Sorkuntzak eta berrikuntzak irakaskuntzan duten garrantzia azpimarratzen du Cristina Urbizuk, mikro-narrazioak hizkuntza-trebetasunak hobetzeko aukera emateaz gain, gai konplexuak modu erraz eta erakargarrian aztertzeko aukera ere eskaintzen du. Ildo horretatik, ikasleek beren komunikazio-gaitasuna modu eraginkorrean gara dezaketela adierazten du, testu labur horiek irakurriz eta aztertuz.

Bukatzeko, mikro-narrazioen inguruko gaztelaniazko bibliografia gomendatzen du adituak. Nahi izanez gero, euskaraz ere badago Sarean Josu Waliñok 2013an ondutako mikro-ipuinen bilduma oparoa: www.mikroipuinak.eus.  

---

Erreferentzia bibliografikoa:

• Herrera, F. (esataria). (2024, ekainaren 29a). LdeLengua 158 sobre micronarrativa en el aula de ELE [Podcasta]. L de Lengua. https://eledelengua.com/micronarrativa-en-el-aula-de-ele-ldelengua-158/.