Artikulu honetan, testuaren funtzioaz dihardu Ernesto Martinek bi ikuspegi ezberdinetatik: oinarrizko unitate linguistiko gisa, batetik, eta, ikaslearen zein irakaslearen aldetik, lanerako oinarri gisa, bestetik.

Betidanik izan da ebaluazioa ikaslea eta irakaslea kezkatu izan dituen prozesua, oraindik orain irtenbide zehatzik ez duena. Arazo-sortzailea da, besteak beste, jokoan dituelako objektibotasuna, etika, justizia... Ez da aurkitu erabat aseko duen irtenbiderik, dantzan jartzen dituelako irakasbideak, baliabideak, irakasten dena eta ebaluatzen dena… Ekoizpenen zuzenketak ere ez du gehiegi ase irakaslea, ez baita argi geratzen zuzenketaren erabilgarritasuna, ez eta eskatzen duen denbora eta denbora horren ondorengo eraginkortasuna. Horrenbestez, zer egin behar da ebaluaziogintzak zentzu handiagoa eta sakonagoa izan dezan? Galdera horri erantzutera dator, aditu honen hitzetan, ebaluazio formatiboa, eta eskatuko du, prozesuak eta emaitzak hobetu daitezen, zuzenketa-denbora ikas-irakasprozesuan inbertitzea.

Eskuartean duzun GIDA DIDAKTIKOA irakasleei zuzendutako dokumentua da, “Kerman mintzalagun bila” sekuentzia multzoa, HEOC-en argitan erabiltzeko lagungarri izateko sortua.

Hizkuntzen irakaskuntzen metodologian eta hiztegiaren eskurapenean ikertzaile garrantzitsua dugu Paul Nation, batez ere, ingelesa atzerriko hizkuntza gisa irakasteko esparruan. Berak ekoiztutako materialak eskura daude Interneten, besteak beste, ikasle helduentzat eta irakasleentzat idatzitako testuak.

Datuak jasotzeko moduetako bat dugu behaketa. Eta erabilera ugari ditu, besteak beste, irakasleen garapen profesionalean. Sarrera interesgarria idatzi du Jaume Batllek eskolen behaketaren eta irakasleen prestakuntzaren inguruan.

Gai horren inguruan ari da José Amenós, Complutense unibertsitateko irakaslea, L de Lengua-ren 112 podcast honetan. Hizkuntzaren eraginpean aritzea eta praktika esanahidunen bidez hizkuntza erabiltzeko aukerak izatea omen da ikasprozesua burutzeko oinarrizko baldintza. Garrantzitsuena xede-hizkuntza behatzen irakastea dela dio, eta ama-hizkuntzarekin harremanetan jartzea. Izan ere, ama-hizkuntzaren ezagutza da xede-hizkuntza ikasteko ikasleak balia dezakeen tresnarik baliotsuenetako bat.

10 ekarpenek osatzen dute “Gramática y aprendizaje de lenguas: perspectivas cognitivas y aplicaciones pedagógicas” udako ikastaroa, HABEk eta EHUk lankidetzan 2004an eratua, eta Legazpi 6ko Joseba Ezeiza, eta Granadako unibertsitateko Jenaro Ortega, Alejandro Castañeda eta José Plácido Ruiz irakasleek eskainia. Gramatika da hitzaldi guztietan ardatz, eta gramatikaren jabekuntza nola hobetu dute mintzagaia.

"Profezia autobeteak euskararen i(ra)kaskuntza eta erabileran" gaia landu zuten Mikel Galicia eta Sergio Foruria irakasleek Hiznet graduondokoaren baitan 2012-2013 ikasturtean, eta, gerora, argitara eman zen ikerketa-lan horren laburpena Bat aldizkarian.