Revista Complutense de Educación aldizkariaren azken zenbakian, 2022ko urtarrilekoan hain zuzen, arrazoi desberdinengatik geure esparrurako interesgarriak izan daitezkeen bi artikulu plazaratu dituzte. Izan ere, mintzamenaz eta idazmenaz bestelako alorretan egindako ikerketak izan dira horien oinarri.

María del Carmen Méndez Santos ELE-irakasleak (ELE: "gaztelania atzerriko hizkuntza gisa"-ren akronimoa, gaztelaniaz) alor horretan diharduten edo jardun nahi dutenei zuzenduriko liburu bat ondu du, askotariko 101 galderari bina orrialdean erantzunez: "101 preguntas para ser profe de ELE: Introducción a la lingüística aplicada para la enseñanza del español".

ALTEren bitartez jakin dugu liburu mamitsua honen berri: The Routledge Handbook of Plurilingual Language Education eskuliburua. Editoreek beraiek nabarmentzen dute eleaniztasunari buruzko lehen argitalpen osoa dela, eta eleaniztasunak hizkuntzaren irakaskuntzan eta gizartean duen izaerari, irismenari eta potentzialari buruzko dimentsio anitzeko hausnarketa eskaintzen du.

"Euskara oinarri eta eleaniztasuna helburu: hizkuntzen garapena eta erabilera aztergai" liburua eman du berriki argitara Euskal Herriko Unibertsitateko Argitalpen Zerbitzuak. Leire Diaz de Gereñu, Ibon Manterola eta Inés M. García Azkoaga irakasleek bideratu dute lan hau.

Gurean ezaguna den Daniel Cassanyren “El arte de dar clase (según un lingüista)” liburua plazaratu da 2021eko urtarrilean. Zehatza izan arren, irakurterraza da. Bere hitzetan, irakasle hasiberriarentzat lagungarria izatea espero du eta, aldi berean, hausnarketarako pizgarri eskarmentua duenarentzat. Izan ere, egunero irakasleak egiten duen hainbat galderari erantzun nahi izan dio aditu katalanak, eta, horregatik, pista, gako eta baliabide ugari aurkituko ditu irakurleak.

"Competencias digitales en el aula. Estrategias y modelos de implementación en la enseñanza de idiomas" liburua idatzi dute Olga Juan-Lázaro eta Leyre Alejaldre Bielek. ELE ikasgelan, eta hizkuntza-ikasgeletan oro har, hezkuntz teknologia txertatzeko gida bat da.

"Decálogo para la mejora de la docencia online. Propuestas para educar en contextos presenciales discontinuos" liburua plazaratu du irailean UOCek. Albert Sangrà izan da koordinatzaile eta zenbait adituren ekarpenak bildu dira. Gai anitzak landu dira 10 kapitulutan zehar, besteak beste, ikastaroen diseinua, jarduerak, ebaluazioa eta atzeraelikadura, erremintak, lankidetza... Sarean eskura jarri dute doan.

Esperanza Román-Mendozak idatzi duen "Aprender a aprender en la era digital. Tecnopedagogía crítica para la enseñanza del español LE/L2" liburuaren errezentsioa idatzi du Abel Camachok.