Marcela Fritzler adituak "Nagusiei eskolak emateko ikuspegi didaktikoa" web-mintegia eskainiko du gaztelaniaz, HABEk antolatuta, urtarrilaren 28an.

• Eguna: Urtarrilaren 28a (asteazkena)
• Ordua: 13:00 - 14:30
• Online (Teams)

Web-mintegian parte hartu nahi baduzu, bete ezazu esteka honetan aurkituko duzun formularioa. Izen-ematea doakoa da. Web-mintegira konektatzeko lotura urtarrilaren 27an jasoko duzu.

Oharra 

Ez da ziurtagiririk emango. 

Web-mintegiaren nondik norakoak

60 urtetik gorako helduei bigarren hizkuntza edo hizkuntza gehigarri bat irakasteak ikuspegi pedagogiko espezifikoa eskatzen du, talde horren beharrak eta interesak aintzat hartuko dituena. Ikasle gazteak ez bezala, ikasle nagusi hauetako bakoitza bere biografia linguistiko, helburu zehatz eta motxila kulturalarekin iristen da eskolara. Beren ikasprozesuaren arrakasta, neurri handi batean, irakasleek ikasle nagusiak motibatzen dituzten faktore afektibo, kognitibo eta sozialak ulertzearen baitan dago, hala nola adimena aktibo mantentzeko nahia edo modu arinean ulertzeko nahiz komunikatzeko aukera.

Web-mintegi honetan, didaktika holistikoa, kulturartekoa eta multisentsoriala lantzeko proposamena egingo da, eta ikaslearen segurtasuna, konfiantza eta autonomia lehenetsiko dituen eskolako giroa sortzeko funtsezko estrategiak aurkeztuko dira, non akatsak prozesuaren zati gisa ikusiko diren. Norberaren bizipenetan ardaztutako jarduerak baliatzen dituen metodologia aurkeztuko da; hau da, hizkuntzaren ikaskuntza ikasleen esperientzia pertsonalekin lotzen duena. Askotariko dinamikak aztertuko dira: jolasak eta benetako materialen erabilera (abestiak edota podcastak, adibidez), adimen artifizial sortzaileen mekanismoak eta belaunaldien arteko proiektuak integratzea.

Ikuspegi honen helburu nagusia hiztegia eta gramatika ikaste hutsetik harago doa. Ikaslea ahalduntzea bilatzen du, bere independentzia sendotuz eta beste hizkuntza bat ikasiz norbera aberasteko, bai norbanako moduan, bai kulturaren alorrean.