Gero eta behar handiagoa sumatzen da helduen euskalduntzean euskara-eskolak ematen ari diren irakasleak jardun bikoan prestatzeko. Hala, 2023ko urtarriletik maiatzera bitartean elkarren osagarri diren bi ikastaro antolatuko ditu HABEk, egitasmo zabalago baten baitan.

Ikastaro hauek online eta era asinkronoan egingo dira, betiere praktika tutorizatuaren balio erantsia bermatuta. HABEko teknikari den Iñaki Murua eta Iruñeko Hizkuntza Eskola Ofizialeko irakasleen prestakuntzan aritutako Ana Rodriguez izango dira tutoreak. Ikastaro bakoitzak 40 orduko iraupena izango du. Funtsezko lau alderdi landuko dira: plataforma, jarraipena eta laguntza, autonomia eta ebaluazioa.

Bi atal izango ditu ikastaro bakoitzak (20 ordu inguruko iraupena ataleko):

• 1217 ikastaroa (urtarrilaren 9tik martxoaren 5era).
  
  • 1217-1. Bi mundu plataformaren bitartez konektatzea. (Ingurune birtual eraginkorra, aurrez aurreko ikasprozesua, ikuspegi kolaboratiboa, era sinkrono eta asinkronoa nola uztartu).
  • 1217-2. Ikasleari bere ikaskuntzan laguntzea. (Tutoretza, feedbacka, pantaila bidezko grabazioa, bideoz emandako feedbacka).
• 1218 ikastaroa (martxoaren 6tik aurrera).
  
  • 1218-1. Ikaslearen autonomia sustatzea. (Ikasleei ikasten laguntzeko estrategiak garatzeko laguntza: bai plataforma erabiltzean, bai jarduerak bakarka edota elkarlanean egitean).
  • 1218-2. Ebaluazioa ikaskuntzaren motor bilakatzea.
    

Atal bakoitzaren gidan daude zehaztuta nondik norako nagusiak (helburuak, tutoreak, landuko diren gaitasun profesionalak, edukiak, metodologia, ikastaroaren jarraipena, tutoreekiko nahiz gainerako partaideekiko komunikazioa, atalaren ebaluazioa, kontuan hartzeko oharrak eta ikasitako estrategiak ohiko eskoletan egikaritzeko aukerak). Irakurgai daude, dagoeneko, 1217 ikastaroko bi atalei dagozkien gidak.

Lehendabiziko ikastaroan aurrematrikula egiteko epeari dagokionez, abenduaren 1etik 16rakoa izango da. Bi ikastaroak egitea komenigarritzat jotzen da. Nolanahi ere,  ikastaroen kalitatea bermatzeko, asko jota, 25 matrikula onartuko dira.

Nagusiki jardun biko eredua landuko den arren, beste edozein irakasteredutan diharduen irakaslearentzat ere guztiz probetxugarriak izango dira ikastaro hauek, ikas-irakas prozesuetako gako didaktiko nagusiak eta horietan teknologien erabilera (Moodle plataformarena, esaterako) jorratzeko aukera izango baita.