Azken bi urteotan, gure artean, zalaparta izugarria sortu du ChatGPT txatbotak. Asko eta asko gara haren atzaparretan erori garenak, bata bestearen atzean eskaintzen dizkigun hitzen sekuentziekin liluratuta. Beste egun baterako utziko dugu horrelako teknologiek duten alde iluna, baina, gaurkoan, bere aurpegi argiak eskaini dezakeen aukeretariko bat azalduko dugu: edozein irudi “ulertzeko” duen gaitasuna. Eta, horretarako, HABEk helduen euskalduntzea ebaluatzeko oinarrizko 10 adierazleren datuekin ChatGPTk zer egin duen azalduko dugu.

Eguneratu egin dira euskalduntzearen sektoreari buruz HABEren webgunean dauden datuak. Lau multzotan daude datu horiek "estatistika-datuak" eremuan.

2023ko urritik 2024ko martxora burutu dira “Jardun bikoa helduen euskalduntzean” ibilbideko ikastaroak. Ataletako batean, ikaslearen autonomia sustatzeari dagokionean hain zuzen, talde-lan bat egin behar izan dute partaideek: aditu bat elkarrizketatu online eta solasaldia bideo edo audio batean jaso. Gainera, elkarrizketa hori iragartzeko kartela egin dute aldez aurretik. Sarrera honetan, zazpi taldeek egindako lanaren emaitza aurkeztuko da. Bestalde, laster emango da argitara tutoreek idatzitako artikulu bat; egindakoaren oinarrian dagoena azalduko da bertan.

Otsailaren 8ko Euskal Herriko Agintaritzaren Aldizkarian eman da argitara HABEren zuzendariaren 2024ko urtarrilaren 29ko Ebazpena, Helduen Euskalduntzearen Oinarrizko Curriculumean (HEOC) ezarritako euskararen komunikagaitasun-mailak egiaztatzeko proben 2024ko ekitaldirako Azterketa Batzordeko kideak, HOBE deialdiaren arduradunak, epaimahaiak, ebaluatzaile ikertzaileak, tutoreak, ordezko tutoreak eta lurralde-arduradunak izendatzeko dena.

Eustatek sortu duen "LurData" zerbitzuaren berri ematen da sarrera honetan. Une honetan egin daitekeena azaltzen da eta helduen euskalduntzean izan lezakeen aplikazioren bat proposatzen.

Lourdes Oñederra Olaizola doktorea izango dugu hizlari 2023ko irailaren 15ean Bilbon egingo den helduen euskalduntzearen 2023/2024 ikasturtearen hasierako ekitaldi akademikoan; Bingen Zupiria Gorostidi Kultura eta Hizkuntza Politikako sailburu jauna izango dugu mahaiburu. Hitzaldiaren izenburua, berriz, “Ahoskeraren lanketa didaktikoa”.

Egungo bizi-erritmoek lanarekin eta familiarekin bateragarriak diren ikas-irakas ereduak eskatzen dituztela ematen du. Halaber, ezinbestekoa da ikas-irakas prozesuak pertsona bakoitzaren ikaskuntza-erritmoei egokitu beharra. Eszenatoki honetan badago, gainera, beste eragile bat: pandemiak sortarazitako ikas- eta irakas-esperientziak. Horregatik, litekeena da irtenbidea eszenatoki hibrido edo jardun bikoetan egotea, horietan konbinatuz modu sinkronoak eta asinkronoak.

Ikastaro honetan, jardun biko irakaskuntzaren marko teoriko-praktikotik abiatuta, esparru honetako esperientziak aurkeztuko ditugu. Horretaz gain, eredu honetan jardun duten edo jardungo duten irakasleei baliagarriak gerta dakizkien zenbait estrategia eta erreminta ere aurkeztuko dizkiegu.

Teoriko-praktikoa izango da planteamendu metodologikoa. Hala, aurkeztutako estrategia eta erreminta batzuk baliatzeko aukera izango da, baita helduen hizkuntzen ikas-irakaskuntzaren esparruko proposamenak era kritikoan aztertzeko ere.

Azkenik, helduen euskalduntzean jardun biko ereduan interesa duten pertsonen arteko komunikazioa eta lankidetzarako proposamen bat egingo da.

Helduen euskalduntzean ikasleen adin-piramidea aldatzen ari da eta deigarria da 60 urtetik gorakoen pertsonen kopuruaren gorakada. Beste testuinguru batzuetan ere gertatzen ari den gertakaria da. Gaiaren inguruko sarrera bat argitaratu dute Difusion argitaletxearen blogean "Aquellos maravillosos años: enseñando ELE a mayores (60+)"; idazlea, Andreas Escudero, Manilako Instituto Cervanteseko irakaslea.