Parekoen behaketa gero erabiliagoa da ikastetxeetan irakasleen garapen profesionalerako praktika gisa. Gogoeta egitea barne hartzen duenez, irakasleek eskolan egin duten lanari eta izan duten jokabideari buruzko gogoeta egin dezakete behaketa modu honi esker, ikasgelan gertatu dena behatuz eta eztabaidatuz. Hala ere, sarritan, irakasle askok ez dute era horretako prestakuntza-ekintzetan parte hartu nahi izaten, behatuak izateak beldurra edo erreparoa ematen dielako. Parekoen behaketaren ezaugarriak analizatzea da artikulu honen xedea, irakurleak sakonago ezagutu ahal izan dezan zer esan nahi duen eta zer eskaintzen dion irakasleen garapen profesionalari. Halaber, parekoen behaketaren ezaugarriak jorratu ondoren, Video Enhanced Observation (VEO) aurkeztuko da. Ikasgelako saioak bideoan grabatzeko aplikazio mugikor bat da, klasean zehar gertatzen diren elementuak eta ezaugarri bereziak etiketatzeko aukera ematen duena, behaketa-prozesua eta, batez ere, behaketaren ondorengo eztabaida, errazagoa, arinagoa, malguagoa eta zehatzagoa izan dadin.

Gizarte honetan, irudien mundua baztertua izan da, oro har, hezkuntzaren eremutik. Dena den, gero eta beharrezkoagoa da irudiari berriz ere protagonismoa itzultzea eta berez daukan potentzial didaktikoa baliatzea. Ildo horretatik, Visual Thinking-a aliatu indartsua izan daiteke bigarren hizkuntza bat ikasteko prozesuan. Izan ere, irudien unibertsaltasunari, kode zuzenari eta interpretatzeko erraztasunari esker, edozein garunek atzeman ditzake kontzeptuak eta ideiak. Halaber, oso formula egokia eta baliozkoa da pentsamendu bisuala narrazio digitalak ekoizteko; horrela, edozein eduki modu bisual eta erakargarrian egituratzen ikasteaz gain, mintzamena eta idazmena lantzen dira.

Testu idatzia gauza hila da: buruarekin sortu eta buruarekin deskodetzen da. Ahozko komunikazioak parte-hartze aktiboagoa eskatzen dio hiztunari. Burua beharrezkoa da noski, gogora datozkigun irudien gainean eraikitzen baitugu ahozko jarduna (ezinezkoa da ikusten ez duguna kontatzea), baina ez da nahikoa. Hitz egiteak gure izate osoaren inplikazioa eskatzen digu: emozioak, gorputza, arima, kadentzia, erritmoa, arnasa…

Dokumentu hau Helduen Euskalduntzerako Oinarrizko Curriculumean eskainitako langaien jarraipena da. Bertan, aurrekoan eskaintzen ziren testu-ereduez gain, beste zazpina testu-eredu eskaintzen dira maila eta trebetasun bakoitzeko; denera, 216 testu.

https://doi.org/10.54512/HEOC_LANG-2020

"Evaluación y aprendizaje" artikulua idatzi du Madrileko Hizkuntza Eskolako Sonsoles Fernándezek; "marcoELE" aldizkariaren 24. zenbakian eman da argitara. Ebaluazio formatiboa edo ikasteko ebaluazioa du helburu; testuinguru nagusia, berriz, hizkuntzaren ikas-irakaskuntza. Alderdi teorikoaz gain, zer, noiz eta nola ebaluatu landu du egindako planteamenduari jarraikiz; datuak biltzeko erremintak ere aurkeztu ditu.

HABEren zuzendari nagusiaren 2017ko urtarrilaren 9ko Ebazpenaren arabera, A1 eta A2 gaitasun-mailei dagozkien ziurtagiriak lortzeko hiru garai zituen ezarrita 2016 urterako jarraibideak. Lehena amaituta, euskaltegi–lagin batetik jasotako ebaluazio-jardueren azterketa duzu eskegita duzun txostenean.

Nola diseinatu Euskaltegiaren Curriculum-proiektua (ECP)? Horra hor etengabe egiten dugun galdera. Euskaltegiaren Curriculum-proiektua, betebehar administratiboa izatetik harago, funtsezko tresna da euskaltegiaren eguneroko funtzionamenduan eta estu loturik ditu elkarrekin hainbat arlo bere baitan: zer irakatsi, nori, noiz, nola eta zertarako, baita nola ebaluatu horiek guztiak ere.

Funtsezko da hizkuntzen irakaskuntzan nola irakasten den aztertzea. Orokorrean, Ikasgelako Behaketa izenburuaren azpian ekintza-multzo bat dago ikasprozesuan eragiten duten aldagaien zer-nolakoen berri jasotzea helburu duena. Hainbat teknika eta estrategia daude datu-bilketak

egiteko, hala nola: txantiloi bidezko behaketak, kontrol-zerrendak, erregistro kualitaboak, bideo-grabazioak, etab.

Nork behatzen duen eta behaketaren zertarakoa ere funtsezkoak dira alor honetan. Bi behaketa-mota bereizten dira usadioz, behaketa parte hartzailea eta parte ez hartzailea. Formazio-saio honetan, behaketa hartzailea, lankidetzazkoa jorratu nahi dugu. Hemen behaketaren helburua ez da jarduera didaktiko desegokiak agerian utzita horiek zigortzea baizik eta elkarlanean jarduera didaktiko guztiak aztertu eta aurrerabideak aurkitzea.