Santurtziko Udal Euskaltegian aspaldi hasi ginen euskara ikasteko online ikastaroak eskaintzen. Urte hauetan era guztietako saiakerak egin ditugu eta komunikazio honetan gaur egun ematen ditugun ikastaroen diseinua eta aribide metodologikoak azaldu nahi ditugu.

Diseinuari begira, gure ikastaroen osagai nagusiak bi dira: moduluak eta unitateak. Modulua ikaskuntza eta irakaskuntza antolatzeko elementu nagusia izango da.  Maila bakoitza antolatzeko oinarrizko osagaia da eta kopurua aldatu egingo da maila batetik bestera. Moduluen deskribapenak lagunduko digu maila barruko eta mailen arteko koherentzia eta batasuna ziurtatzen. Modulu bakoitza 10 bat orduko 5 unitatek osatzen dute.

Unitateari esker ikas ibilbide estandarrak diseinatzeko modua izango dugu. Unitatearen izena ohiko komunikazio-egoera bat izango da. Horrela, hizkuntza-erabileraren testuingurua modu esplizituan eskainiko dugu, eta horrela zehaztu ahal izango dugu zein diren testuinguru horretan hiztun batek garatu beharreko jarduera komunikatiboak.

Aribide metodologikoei dagokienez, hainbat prozesu zaindu behar dira bereziki birtualitatean: komunikazio-tresnen erabilera, irakaslearen diskurtsoa, ikasleen diskurtsoa, elkarreragina eta lankidetza bultzatzeko estrategiak...