Testu anitzetan, ‘jendarte’ hitza ‘gizarte’-ren sinonimo gisa erabiltzen da, ‘gizarte’ ustez sexista eta baztertzailea ordezkatzeko, baina adibide batzuen bidez ikus dezakegu horien arteko desberdintasuna. Testuinguru batzuek zalantza eta eztabaida sortzen dute, eta horiek argitze aldera, ikus ditzagun Euskaltzaindiaren Hiztegiko hitz horien adierak:
- Jendarte. iz. Leku agerian dagoen jendea; jendea, jende multzoa.
- Gizarte. iz. Giza lagunartea, gizadia elkartetzat hartua; lege eta erakunde berberen azpian bizi den gizaki multzo iraunkorra.
- Lagunarte. iz. Toki batean gertatzen diren lagunen multzoa
Hiru hitz horiek, esanahiari dagokionez, sinonimoak izan daitezke, baina neurri batean. Ez dute esanahi bera zehazki, eta testuinguru desberdinetan darabiltzagu: 'gizarte' modu orokorrago edo publiko batean eta era abstraktuan aipatzen dugu, eta 'lagunarte', hitzak berak dioen moduan, lagun arte pribatuan edo modu intimoan. 'Jendarte' terminoa aurreko bi horien artean kokatzen da; izan ere, Ipar Euskal Herrian orain gutxira arte 'jendarte' erabiltzen baita gehienbat eta ez 'gizarte'.

Hego Euskal Herrian ere, azken hamarkadetan genero-ikuspegia dela eta, 'jendarte' hobetsi da testu askotan. 'Gizarte' baztertu da, hitzaren barnean 'giza-' erroa dagoelako, uste delako erro horren azpian 'gizon' dagoela. Horren arabera, honako hitz hauek ere baztertu beharko genituzke: ‘gizabide’, ‘gizadi’, ‘gizabanako’, ‘gizeraile’ eta zerrenda luze bat.

Baina 'giza-' erroak bere barnean ez du 'gizon', baizik eta 'izaki humanoa' edo 'pertsona abstraktu', eta beraz, ezin erran 'gizarte' hitzak gizon-talde bati egiten dionik erreferentzia.

EUSKALTZAINDIAREN GOMENDIOA
Bukatzeko, erdarazko 'sociedad' edo 'société', maila formal, abstraktu eta orokorrean aipatu nahi denean, ‘gizarte’ hitza da euskaraz hobestekoa euskara batuan, euskalkiak euskalki; 'jendarte' jende-talde bat bilduta dagoenean; eta 'lagunarte' lagun-talde bat dagoenean.