Atal berria sortu dugu Irakasbileko Bideotekan; "Bi hitzetan" du izenburu. Bilduman, adituek grabatutako bideo laburrak egongo dira. Euskaraz ez badaude, azpitituluak izango dituzte. Halaber, material osagarria eskainiko da, bibliografia esaterako.

HABEk laugarrenez eskaini nahi du "Jardun bikoa helduen euskalduntzean" prestakuntza-egitasmoa, helduen euskalduntzean eskolak ematen ari diren irakasleak jardun biko irakastereduan berariaz prestatzeko. Helburua da gaitasun digitala areagotzea eta garapen profesionalerako baliagarri izatea.

Bi ikastarok osatzen dute 2025eko urritik 2026ko martxora bitartean gauzatuko den prestakuntza-eskaintza. Ikastaroak online egingo dira; betiere, praktika tutorizatuaren balio erantsia bermatuta. Lehen ikastaroaren aurrematrikulazio-epea 2025eko ekainaren 3tik 11ra bitartean izango da.

Itzulpen Saila bildumako 57. zenbakia ere sarbide irekian (open access) jarri du HABEk. Hala, eta bildumako beste zenbait libururekin egin den bezala, interesaturik dagoen orok eskura izango du Enrica Piccardok eta Brian Northek idatzitako "Ekintzara bideratutako ikuspegia" Irakasbil webgune honetan, pdf formatuan eta "Creative Commons by-nc-nd" lizentziapean (Aitortu-EzKomertziala-LanEratorririkGabe).

Naiara Berasategi Sancho EHUko irakaslea izango dugu hizlari 2025eko irailaren 19an Donostian egingo den helduen euskalduntzearen 2025/2026 ikasturtearen hasierako ekitaldi akademikoan; Ibone Bengoetxea Otaolea lehenengo lehendakariorde eta Kultura eta Hizkuntza Politikako sailburu andrea izango dugu mahaiburu. Hitzaldiaren izenburua, berriz, “Pedagogia inklusiboa”.

Barakaldoko Euskara Udal Erakunde Autonomoan (Udal Euskaltegia) jardungo duten euskara-irakasleen lan-poltsarako meritu-lehiaketa arautuko duten oinarriak eman dira argitara Bizkaiko Aldizkari Ofizialean.

HABEk ikerketa-eremu berriak zabaldu eta landu nahi ditu helduen euskalduntzean, bereziki aniztasun funtzionalaren eremuari erreparatuz, bigarren hizkuntzen ikas-irakas prozesuen eta desgaitasunen eremuekin zerikusia duten gaietan prestatzeko egitasmo zehatzak emanez. Horretarako, ikertzaileen gaikuntzarako beka-deialdia egitea erabaki du.

Hala, 2024ko abenduaren 12ko Ebazpena argitaratu da EHAAn, bekaren oinarriak onartu eta deia egiten duena. HIlabeteko epea dago eskariak aurkezteko, argitaratu eta hurrengo egunetik zenbatzen hasita.

HABEk, Elkar argitaletxearekin elkarlanean, "PRIMERAN! C1.2” materiala plazaratu berri du, 2023ko maiatzean argitara eman ziren lehen liburukiari eta web-atariari jarraipena emanez, Aurrekoa bezala, HEOCaren ildo metodologikoei jarraikiz, jardun biko ikasteredurako egin da. Ikaslearen liburuak, "Moodle PRIMERAN!C1" ikastaroa eta web-ataria dira euskarri nagusiak. Ikaslearen liburu horiek salgai daude Euskal Herriko saltoki nagusietan eta Internet bidez.

Itzultzaile neuronala eta hizkuntza teknologiak erabiltzeko moduak euskararen erabilera nola baldintzatzen duen ikertu du Itzulinguru proiektuak. Hala, gaur egun egiten den itzultzaile neuronalaren erabilera aztertu da; esku-hartze esperimentalak egin dira 25 gunetan eta ikasgaiak atera dira euskararen biziberritzea eta erakundeen funtzionamendu eraginkorra ahalbidetzeko. Gune horien artean hezkuntzakoak ere badaude, euskaltegiak besteak beste.