Iraide Ibarretxe-Antuñano irakasle katedraduna eta ikertzailea izango da 2020/2021 ikasturtearen hasiera-ekitaldian hizlaria, irailaren 18an, Bilboko Euskalduna Jauregian egingo den jardunaldian. Hitzaldiaren izenburua, berriz, "Pentsatzearen garrantzia hitz egiterakoan: hizkuntza-tipologia aplikatzea hizkuntzaz jabetzeari eta hizkuntzaren pedagogiari" izango da.

Hizkuntza Politikarako Sailburuordetzak (HPS) urteak daramatza ingurune digitalerako euskarazko edukiak eta bestelako baliabideak diruz laguntzen edo sustatzen. Alabaina, askotan ez da erraza izaten eduki edo baliabide horietara heltzea ahaleginak egiten diren arren.

Horretaz kezkatuta, eta EABren Ingurune Digitalean Euskara Sustatzeko Batzorde-atalean hainbatetan egindako gomendioari jarraikiz, produktu horiek zabaltzeko kanpaina bat abiatzea erabaki du HPSk: Gozatu Sarean Euskaraz!. Aipatutako kanpaina gizarte-sareetan udan zehar burutuko da. Lehenengo fasean aisialdiarekin eta kirolarekin lotutako eduki eta baliabideak zabalduko dira. Hurrengoetan, berriz, beste batzuk, kulturakoak eta euskara ikastekoak esaterako.

"Principles of Good Practice" (Jokabide egokien oinarriak) dokumentuaren hirugarren edizioa plazaratu du ALTE erakundeak berriki. Bi argitalpen daude honen aurretik: 1994an egin zen lehendabizikoa eta eta 2001ean bigarrena. Hizkuntza-probak sortzean eta aplikatzean ALTEko kide eta afiliatu guztiek sinatzen dituzten jarraibideen bilduma koherentea osatzea da asmoa.

Hezkuntza eta ikaskuntza elkarreraginpean burutzen diren prozesutzat hartzen dira, irakasteak hitz egitea dakarrela ulertuta, elkarrizketak izatea. Horrela, elkarrekintza ez ezik, elkarren artean osatzen den pentsamendua ere badugu ikaskuntzan; pentsamendua eta hizkuntza hertsiki loturik baitaude. Eta, horregatik hain zuzen, pedagogia dialogikoa indartzeko beharrezkoa izango da ikasgelan elkarreragina sustatzea, izan aurrez aurreko saioetan, izan online bidez bideratutakoetan.

Azken hamarkadotan, bigarren hizkuntzen irakaskuntza planteatzeko moduak aldaketa handia ezagutu du. Hasiera batean, xede-hizkuntzaren izaerari, ezaugarriei eta irakasteko moduari buruzko galderetatik abiatzen baginen ere, oraingo abiapuntua bigarren hizkuntza hori nola ikasten den, eta, hori errazteko, zer egin behar dugun galdetzea da.

Liburu mardula plazaratu zuen Routledge argitaletxe akademiko ospetsuak 2018ko azaroan: "The Routledge Handbook of Spanish Language Teaching". Izenburu hori izan arren, gaztelaniaz dago ia guztia; azpititulua bera ere hizkuntza horretan dago: "Metodologías, contextos y recursos para la enseñanza de español como L2". Testuinguruak testuinguru, ekarpen baliagarriak ditu gure esparrurako. Are; gurean lankide izan dugun hainbat aditu dago idazleen artean.

“¿A qué nos referimos cuando hablamos de ‘usar la lengua para aprenderla’?” hitzaldia eman zuen 2010ean Ernesto Martín Perisek. Horretan oinarritua, Bellaterra Journal of Teaching & Learning Language & Literature aldizkarian argitaratu zuten artikulu bat urte berean. 2011n, berriz, HIZPIDE aldizkarian ere plazaratu zen bertsio bat "Ikasleak hizkuntzaren erabiltzaile gisa: ikasgelako praktikak hizkuntzen irakaskuntzan" izenburuaz.

Teknologiaren garapena eta berrikuntza ugaria da, aplikazioak eta baliabide digitalak sakabanatuta daude eta sarri askotan daudenik ere ez da jakiten. Beste batzuetan teknologiak ahalbideratzen du eskolan egiten duguna beste modu batera egitea, baina zaila izaten da egunerokoari buelta ematea eta jardunbide teknopedagogiko egokietan sartzea. Ez da nahikoa euskarri digitalean betiko praktika errepikakorrak egiten jarraitzea. Baliabide digitalek hizkuntza-erabilera eta ikas-prozesua indartu behar dute.