Teknopedagogia praktikoa: teknologia digitalak hezkuntzan integratzeko ereduak eta diseinu didaktiko digitala (Arroyo Sagasta, A.)

Argitaratua: Wednesday, 10 January 2024, 12:48 PM
"Teknopedagogia praktikoa" liburuaren azala

2023an UEUk argitaratutako liburu honetan, teknologia digitala modu kritikoan integratzeko gakoak eta irizpideak ematen ditu Amaia Arroyok. Gaur egungo gizartea digitala izanik, ikasprozesuetan teknologia digitalak integratzeko adibide eta ideia praktikoak ematen ditu, atal bakoitzeko informazio osagarria duen QR bat baitu Interneteko esteka batekin. 

Liburua teknologia digitala ikasprozesuetan integratzeaz kezkatuta dagoen irakasle ororentzat egokia izan daitekeela dio egileak berak UEUren liburuari buruzko elkarrizketa batean. Izan ere, azkenaldian ikaslea erdigunean jarri nahi duen hezkuntza-sistema batean sarturik gaude, eta horrek inplikazio argia du irakasleen funtzioan. Ikaslea erdigunean jartzeak aktibo bilakatzen ditu, eta, ondorioz, irakasle aktiboak behar izatera garamatza. Irakaslea, egun, erraztaile gisa hartzen da, eta ikaslearen sormena eta ikerketa sustatzeko testuinguruak sortzea eta diseinatzea dagokio irakasleari. 

Ikuspegi instrumental hutsa albo batera utzirik, ikuspegi teknopedagogikoa erabiltzea proposatzen digu argitalpen honen egileak, alegia irakasprozesuan baliabide teknologikoa erabiltzeak onurak ekarriko ote dituen norbere buruari galdetzea. Argitze aldera, Sarean dagoen bideo batean (https://www.youtube.com/watch?v=Cz6XNSC4kU4) Amaia Arroyok berak azaltzen digu, besteak beste, geure buruei lau galdera funtsezko egitea beharrezkoa dugula, baliabide edo tresna jakin bat erabili behar dugun ala ez jakin dezagun: Zergatik? Zertarako? Zer? Nola?

Beraz, ikasgelan aplikagarri izan daitezkeen diseinu teknopedagogiko horiek sortzeko, kontuan hartu beharreko hiru alderdiren berri ematen digu autoreak:

  1.     Alderdi akademikoak curriculuma du oinarri, eta bi atal nabarmentzen dira: funtsezko konpetentziak eta ikasegoerak.  
  2.     Alderdi sozialean bi adierazle hauek azpimarratzen dira: teknologiaren erabileraren pertinentzia edo egokitasun didaktikoa.  
  3.     Alderdi materialean, berriz, bi adierazle azpimarratzen dira: arrakala digitalaren identifikazioa eta digitalak edo teknologikoak ez diren baliabideen kudeaketa.

Horiek guztiak kontuan hartu edo ez balioesteko eta gure diseinua ebaluatzeko, gai honetan adituak ikasegoera teknopedagogikoen kontrol-zerrenda bat eskaintzen digu, oso baliagarriak diren gako-galdera batzuekin. Hori baliatzeko eta inprimatzeko bertsioan deskargatu ahal izateko, QR kodea ematen da liburuan.  

Liburuaren azken atalean, aurrera begirako joerak eta erronkak aipatzen dira, baita azken QR kode bat ere, irakurleak berak bere ekarpenak egin ditzan, eta, nahi izanez gero, #digikasi traolarekin sare sozialetan bere iritzia parteka dezan.

HABE liburutegian.



Erreferentzia bibliografikoa:

Arroyo Sagasta, A. (2023). Teknopedagogia praktikoa: teknologia digitalak hezkuntzan integratzeko ereduak eta diseinu didaktiko digitala. UEU.
 

Show comments
  • Ainara Maya UrrozAinara Maya Urroz - Wed, 17 Jan 2024, 1:04 PM
    UEUren Negu/Udaberriko ikastaroen barruan, Amaia Arroyoren liburuarekin du zerikusia honako honek: "Teknopedagogia tailerra: Teknologia digitalen erabilera ikas-irakaskuntza prozesuetan" (ONLINE. Urtarrilaren 31n hasten da). Kontuan hartu matrikulatzeko epea urtarrilaren 24an bukatzen dela, eta ikastaro-tailerrari buruz gehiago jakin nahi izanez gero, UEUren webgunean duzue: https://www.ueu.eus/jarduera-akademikoa/1979-teknopedagogia-tailerra-teknologia-digitalen-erabilera-ikas-irakaskuntza-prozesuetan?utm_campaign=bol-akademikoa-udaberria-2024-1&utm_medium=email&utm_source=acumbamail

Beste eduki interesgarriak

Amaia Arroyo

Irakaskuntzarako bideoak: zergatiak, irizpideak eta gidalerroak

Egun, gutxiago irakurtzen dugun ideia bolo-bolo dabil: liburu gutxiago, aldizkari gutxiago… Informazio gutxiago jasotzen al dugu? Argi dago ezetz. Informazioa inoiz baino saretuago dagoen momentu honetan, bistakoa da edukiak kontsumitzeko ohiturak aldatu egin direla, oro har. Ikus-entzunezko komunikazioa edo komunikazio digitala da hedatuen dagoena, testu idatzitik harago doana, hain zuzen ere, eta bideoa da horren adibiderik garbiena. Hezkuntza-esparruak ezin dio muzin egin agertoki berri horri eta hezkuntza-jardunean bideoak txertatzeko ahalegina egin beharko litzateke. Artikulu honen helburua da horretarako irizpideak eta gidalerroak eskaintzea
UI aurkezpena (H16-21)

H16-21 - Teknologiak eta gaitasun digitalak hizkuntzen ikas-irakaskuntzan: elkarrekin eta elkarrengandik ikasteko gakoak. Ikastaroaren aurkezpeneko bideoak

Uztailaren 12, 13 eta 14an HABEk EHUrekin elkarlanean antolatutako "H16-21 - Teknologiak eta gaitasun digitalak hizkuntzen ikas-irakaskuntzan: elkarrekin eta elkarrengandik ikasteko gakoak" ikastaroa burutu zen. Lehen eguneko aurkezpenean, besteak beste, Jokin Azkue HABEren zuzendari nagusiak eta Iñaki Murua ikastaroaren zuzendariak hartu zuten hitza. Bideo banatan bildu ditugu bien aurkezpenak (erantsitako dokumentuan, Jokin Azkueren hitzak).
Amaia Arroyo

1224 - Bideoak ikasprozesuan: aukerak eta baliabideak

Ikastaro honen helburua bideoak ikasleen artean ikaskuntza sustatzeko izan dezakeen ahalmenaz jabetzea izango da. Horretarako, bideoak ikaskuntza-testuinguruetan izan dezakeen erabileraz arituko gara. Bideoen erabilera didaktikoari buruz hausnartuko dugu, baita horren inguruko hainbat gako landu ere. Horretaz gain, ikaskuntzarako hainbat bideo-mota nola egin daitezkeen eta horiek ikaskuntzan zer funtzio izan dezaketen landuko da. Ikastaroaren amaieran, parte-hartzaile bakoitzak bideoa erabiltzeko proposamen bat diseinatuko du, baita bideo-eredu bat sortu ere.