Ekaina heldu da, eta, horrekin batera, ikasturtea ixteko premia administratiboa: aktak, bilerak… Zurrunbilo horretan, interesgarria da Guerreroren ekarpena (2026) ikaslearen ebaluazioaz. Txostenak betetzeko unean, arriskua dago soil-soilik oroimenera jotzeko, eta horrek informazio generikoa, etiketatzailea eta laguntza gutxikoa sortzea ekar lezake. Horregatik, azken balorazioa ikasturtean zehar bildutako ebidentzietan oinarritu behar da (errubrikak, oharrak, ekoizpenak…), oroimenaren alborapenak saihesteko.

Guerrerok hiru ataleko egitura proposatzen du: 

1. Ikasleak zer lortu duen.
2. Bidean dagoena, ikasleak oraindik autonomiaz menderatzen ez duena, denbora luzeagoa eta praktika zabalagoa eskatzen diona.
3.  Aurrera egiteko proposamen zehatzak.

 Halaber, beste ekarpen esanguratsu bat egiten du: errealitatea etiketatzeari uko egitea eta jokabidearen zein ikasprozesuaren deskribapen zehatza egitea. Adibidez,  “adigalkorra da” esan beharrean, egokiagoa litzateke honela adieraztea: “jarduera luzeetan arreta mantentzea kostatzen zaio, batez ere bakarka lan egiten duenean”. Ildo horretan, CCA printzipioa erabiltzea proposatzen du (conducta [jokabidea] + contexto [testuingurua] + acción [ekintza]), era batera edo bestera ematen dugun informazioa, zehatzagoa, orientatzailea eta motibatzailea izan dadin.

Ikuspegi hori bat dator Helduen Euskalduntzearen Oinarrizko Curriculumak (HEOC) dioenarekin: ebaluazioa informazio-bilketa sistematikoa da, hobekuntzara bideratutako deskribapen eta iritzi arrazoitua emateko. HEOCaren arabera, ebaluazioak ez du funtzio sumatibo hutsa; funtzio formatiboa du nagusi, prozesua bera erregulatzeko, moldatzeko eta doitzeko. Gainera, ebaluazioak ikuspegi zabala eskatzen du; izan ere, ikaslea ez da ebaluagai bakarra, irakaslea eta euskaltegia bera ere hobekuntzarako unitate gisa aztertu behar baitira.

Hori horrela, ebaluazio-prozesu hori maila instituzionalera eramateko une estrategikoa da ekaina. Gairínen hitzetan (2026), hobekuntza ez da berez gertatzen; horretarako, elkarrekin lotuta dauden lau arlo garatu behar dira: curriculuma, erakundea, arlo profesionala eta komunitatea. Zentzu berean, Arizak (2026) proposatzen du ikasturte-bukaerako memoria ez izatea amaierako puntu bat, banda edo bisagra bat baizik, bizi izan dugunaren eta irailerako erabaki nahi dugunaren arteko lotura-puntua, alegia. Arizak gogorarazten digun bezala, hurrengo ikasturtea ekainean hartzen diren erabakietatik hasten da. Hala, helburua ez da memoria luzeagoak idaztea eta dokumentu gehiago pilatzea, bizi izan duguna hobeto irakurtzea eta funtsezkoa identifikatzea baizik: zer ikasi dugun, zer erabaki hartuko ditugun eta horretarako zer baldintza behar ditugun. 

Laburbilduz, ikasleen emaitzak aintzat hartuta, ekaineko ebaluazioa eta memoria euskaltegia "ikasten duen erakunde" bihurtzeko iturri nagusiak dira. Gogoeta banakakoarena izatetik kolektiboarena izatera igarotzean, esperientzia hori guztia ezagutza partekatu eta irizpide bilakatzen da hurrengo ikasturterako plangintza berrirako. Horrela, ekaineko itxiera ez da tramite burokratiko bat izango, hurrengo ikasturteko lehen hobekuntza-ekintza baizik, ikas-irakas prozesuen kalitatea etengabe sustatzeko eta pertsona zein erakunde gisa ikasteko.

Erreferentziak

Ariza Pérez, M. A. (2026, ekainaren 5a). Junio no debería ser solo cerrar actas: debería ser aprender como centro.  Miguel Ariza. https://miguelariza.es/2026/06/05/junio-no-deberia-ser-solo-cerrar-actas-deberia-ser-aprender-como-centro/

Gairín Sallán, J. (2026). Hezkuntza-erakundeak hobetzea. Etengabe ikasten duten profesionalak eta erakundeak. e-Hizpide, 107. https://doi.org/10.54512/EJEU5118

Gonzalez de Txabarri, J., Elosegi, L., Agirre, H., Larramendi, A., Maiz, A. eta Gonzalez de Txabarri, L. M. (2015). Helduen Euskalduntzearen Oinarrizko Curriculuma (HEOC). HABE, Helduen Alfabetatze eta Berreuskalduntzerako Erakundea. https://doi.org/10.54512/HEOC-2021  

Guerrero, I. (2026, ekainaren 7a). ¿Cómo hacer los informes en menos tiempo? Educlaustro – Boletín Educativo.  https://educlaustro.substack.com/p/como-hacer-los-informes-en-menos