Ohargarria benetan Garbiñe Ubedak gaurko zutabean erabili duen konektorea: batez ere eta sustut.
- Baina esango niokeen batez ere eta sustut, zakurrak gorrotagarri iruditu izanagatik ere, kale bat gorago bizi den rottweilerra gogorarazi zidala. (https://www.berria.eus/paperekoa/1891/019/001/2023-05-19/aura-txarra.htm).
Batez ere baino zertxobait gehiago bide da, haren aldaera indartua-edo. Mattin Irigoienek ere badarabil, Nola eutsi diogu gure euskarari? idazlan trinkoan, izatez Iparraldekoa baita forma hori. Beheko adibide horretan oso ongi da sumatzen indargarri dela:
- Eta gomendatzen dizuet berdin egitea. Batez ere eta sustut. (Nola eutsi diogu gure euskarari / Mattin Irigoien).
Batez ere eta batik bat ere erabili izan da da adiera bertsuan, behean ikus dezakezuenez:
- Erakargarriak baitira, batez ere eta batik bat, Igerabideren poema ederrak. (https://www.ibbygaltzagorri.eus/eu/haur-eta-gazte-literatura/argitalpenak/hosto-gorri-hosto-berdehoja-roja-hoja-verde).
- Hizkuntza, edozein Hizkuntza, eta, beraz, euskara ere bai, ez da ikur hutsa, baizik, batez ere eta batik bat, komunikatzeko zeregina betetzen duen tresna (Eusko Legebiltzarra/ Bilkura Egunkaria).
Sustut sarrera, bere horretan, jasoa dago Orotarikoan. Informazio osagarriko estekan duzue, nahi izatera.
Informazio osagarria:
- Orotariko Euskal Hiztegia / sustut.
