Aitzol Astigarraga adituak "Adimen artifiziala euskararen irakaskuntza inklusiboan" web-mintegia eskainiko du, HABEk antolatuta.

Parte hartu nahi izanez gero, bete ezazu formularioa, martxoaren 15a baino lehen. 

Oharrak: 

- Jarduera doakoa da eta ez da ziurtagiririk emango.
- Web-mintegira konektatzeko lotura eta jarraibideak aldez aurretik jasoko dituzu.

Web-mintegiaren nondik norakoak

Digitalizazioa eta adimen artifiziala nonahi aurki daitezke gure gizartean gaur egun, eta paradigma-aldaketa betean gaude. Zer eta nola ari da aldatzen? Zer aukera eta zer arazo sortzen dizkigu horrek guztiak, euskal komunitatean eta euskararen irakaskuntzan? 
Gaur egungo hizkuntzen irakaskuntzan, adimen artifiziala (AA) eta hizkuntza-teknologiak (NLP) ezinbesteko bidelagun bihurtu dira. Saio honetan, adimen artifiziala (AA) eta hizkuntza-teknologiak izango ditugu aztergai. Teknologia horiek euskaltegiko gelan duten potentziala aztertuko dugu, arreta berezia jarriz inklusioan eta irisgarritasunean. 

Edukiak: 

• Euskara digitalitatearen aurrean 
• Adimen artifizialaren historia laburra
• Hizkuntza teknologiak
• Hizkuntzen irakaskuntza eta inklusiorako aukerak

Saioaren helburu nagusia: 

Irakasleei adimen artifizialaren (AA) eta hizkuntza-teknologien (NLP) inguruko ikuspegi orokor eta praktikoa eskaintzea, tresna hauek euskararen irakaskuntzan eta ikasleen inklusioa bermatzeko duten potentzialean arreta jarriz. 

Aitzol Astigarraga

Ikasketaz Ingeniaria Informatikan eta doktorea Robotika eta Adimen  Artifizialean (EHU). Egun Orai NLP zentroko koordinatzailea da —hizkuntzaren prozesamendu automatikoan (NLP) espezializatutako Elhuyarren ikerketa-zentroa—. Hizkuntzan oinarritutako adimen artifiziala ikertzen du Oraik eta ondoko plataformen oinarri  teknologikoak garatu ditu: Elia itzultzaile automatikoa (elia.eus),  Aditu azpititulazio eta transkripzio sistema (aditu.eus) eta  TTSneuronala hizketa-sintesiko sistema (ttsneuronala.elhuyar.eus).  UEUko eta Euskal Wikilarien kide ere bada.