Gaurko egunez argitaratu da otsailaren 22ko HABEren zuzendari nagusiaren Ebazpena, 2016. urteko ohiko deialdiak egiten dituena (eranskinean), HABEren Erregistroan inskribatuta dauden euskaltegietako eta euskararen autoikaskuntzarako zentro homologatuetako ikasleek Helduen Euskalduntzearen Oinarrizko Curriculumean zedarritutako komunikagaitasun-mailak egiazta ditzaten.

Datorren astelehenean argitaratuko da 2016ko ohiko deialdiak arautzen dituen HABEren zuzendari nagusiaren otsailaren 22ko Ebazpena, hain zuzen, urteko ohiko deialdiak egiten dituena. Aurtengo egiaztatzegintzak urteko lan-jardunaren zati bat hartuko duen heinean, eranskin eta argigarri gisa duzu deialdi horien nondik norako nagusiak zehaztu nahi dituen dokumentua.

Primeran! A2 bildumak helduen euskalduntzerako A2 mailan taldean eta aurrez aurreko saioetan erabiltzeko langai didaktikoak biltzen ditu. Ikasmaterial hau HEOCak zedarritutako A2 Oinarrizko erabiltzailearen mailak euskara-ikasleari aurreikusten dion gaitasun komunikatiboa bereganatzeko sortu da. Egilea Aek-ko irakasle-talde bat da eta argitalpen honen editorea, Elhuyar.

Montserrat Castelló irakasle dugu Bartzelonako Ramón Llull Unibertsitatean. Idazmena lantzeko modu batez hitz egiten digu bideo honetan, berak idatzitako testu bat abiapuntu hartuta.

Montserratek parte hartuko du 2016ko udan HABEk irakasleen prestakuntzarako antolatutako ikastaroetan; idazmena landuko du Bilbon irailaren 5 eta 6an.

Difusion-Prolinter Sarien II. edizioko sariak eman eta irabazleen lanak aurkeztu dira berriki Madrilen antolatu diren "VII Jornadas Didácticas para profesores de ELE" jardunaldien baitan.

Hizpide 86an artikulua idatzi zuen Hector Ríos dugu sarituen artean, aldizkarian aurkeztutakoarekin lotura zuzena duen lan batekin.

2016ko ekainaren 23tik 25era izango da Madrilen "III Congreso Internacional Nebrija en Lingüística Aplicada a la Enseñanza de Lenguas: En camino hacia el plurilingüismo". Aurtengo kongresuan, euskara izango dute hizkuntza gonbidatuen artean.

Apirilaren 4a arte dago irekita ekarpenak (komunikazioak, tailerrak, posterrak) proposatzeko epea .

HIZPIDE aldizkariaren 85. zenbakiak argitaratu genuen Kukulska-Hulme eta Shieldek idatzitako artikulu bat, "Mugikor bidez lagundutako hizkuntzen ikaskuntzari buruzko ikuspegi bat: edukia banatzetik lagundutako elkarlan eta elkarrekintzara" hain zuzen. Erreferentziazkotzat jo izan da 2008ko lana izan arren; MALL (Mobile Assisted Language Learning) edo mugikor bidez lagundutako hizkuntzen ikaskuntza gaiaz idatzitako lehendabiziko monografikoan agertu baitzen.

Dena den, aldaketa ugari izan ditu gailu mugikorren bidez ikasteak, hala smarthponeak nola tabletak baliatuta. RIED aldizkariak monografiko bat atera berri du, eta sarreran aukera berriez idatzi dute.

"La formación del profesorado de español. Innovación y reto" liburua argitaratu du International Housek Difusión argitaletxearekin elkarlanean, gaztelania-irakasleen prestakuntzan ari direnetik 30 urte bete direla-eta. Francisco Herrera editoreak aurkeztu digu liburua.