Esku artean duzun diagnostiko hau garatzeko beharra HABEren I Berdintasun planean (2019-2022) EAEko euskaltegiekin lotura zuten hainbat ekintza garatzeko orduan kalitatezko informazio eguneratua izateak zuen garrantziaren inguruko hausnarketatik dator. Hala, Emakumeak ahalduntzeko programak eta helburuak barne hartzen dituen ardatz bat dago plan horretan eta ardatz horren baitan badira EAEko euskaltegietan emakume eta gizonen aukera-berdintasuna bultzatu eta genero-ikuspegia txertatzearekin lotura zuzena duten hiru ekintza. Ekintza horiek modu egokian aurrera eramateko, hau da, euskaltegi desberdinetako errealitate, ikuspegi eta beharrei erantzunez jarduteko, beharrezkoa zen aldez aurretik gaiaren inguruko diagnostiko bat burutzea.

 Arestian esandakoa kontuan hartuta, diagnostiko honen helburuak honako hauek izan dira:

2.       EAEko euskaltegietan emakumeen eta gizonen arteko berdintasuna bultzatzeko egun identifikatzen diren erronka, zailtasun eta aukera nagusiak identifikatzea eta horiei aurre egiteko -edo horiek aprobetxatzeko- ekintza eta estrategia posibleak formulatzea, bereziki, HABEk dituen eskumen eta funtzioak oinarri hartuta bultza daitezkeenak jasoz.

3.       EAEko euskaltegiek sortzen duten ekosisteman emakumeen eta gizonen arteko berdintasunaren inguruko eztabaida eta elkarrizketa eman dadin lagundu, egun gai honen inguruan dauden ikuspegi eta jarrera desberdinak ezagutu eta haien arteko trukea bultzatuz.

Txostenaren egiturari dagokionez, lehenik eta behin, EAEko euskaltegien sarearen deskribapen labur bat egiten da. Gerora, diagnostikoaren helburuei erantzuteko baliatu den metodologia zein izan den azaltzen da. Hirugarrenez,  diagnostikoaren emaitzak jasotzen dira, bai ikuspegi kuantitatibo zein kualitatibo batetik. Azkenik, jasotako informaziotik eratortzen diren ondorio nagusiak laburbiltzen dira eta, ondorio horiek kontuan hartuta, HABEk etorkizunean gara ditzakeen ekintza zehatzak jasotzen dira.