Etziko finalaren ataritan, bertsolaritzak euskararen ikas-irakaskuntzan izan dezakeen eraginaren gainean idaztea otu zait. Asko izan omen ziren 60ko hamarraldian, Beattles musika-taldearen letrei esker, ingelesa dezente ikasi zutenak. Harrezkero ere, zer eragin ez ote du izan ingelesaren ikaskuntzan musikak?
Gurera etorrita, gero eta euskal musika-talde gehiago eta hobeak izateaz batera, ezin ahaztu dugu bertsolaritzak euskal komunitatean duen indarra. Xenpelar Dokumentazio Zentroaren esku dagoen Bertsolaritzaren datu-basea (BDB) altxor ederra da euskara ikasteko:
- Bertsoak entzun egin daitezke, entzumena trebatzeko edo doinuak ikasteko.
- Transkripzioak ere eskaintzen dira, bertsoak ikasteko edo diskurtsoa aztertzeko.
- Bertsolarien diskurtsoa berme handikoa da.
- Gaitasun soziokulturala trebatzeko primerako baliabidea da. Euskaran eta euskal komunitatean murgiltzeko aukera paregabea da.
- Irakaskuntza ludikoa bultzatzeko modua da, eta abar eta abar eta abar.
Etziko finala girotzeko, Lopategi zenak (Beltza, ezizenez) eta Amurizak osaturiko bertsoaldiaren amua uzten dut hemen zintzilik, inork kosk egin nahiko balio ere. 86ko "Txapela ez dizu emango bikarbonatuak!" hura gaur bertan entzun izan banu bezala daukat iltzatua gogoan! Baita "Zuk pena saltzen duzu, nik alegrantzia!" azken puntu hura ere. Egin ditu hotz-bero batzuk handik honezkerokoan!
Behean duzue bertsoaldiaren esteka. Egañak eta Peñak ospetsu egin zituzten Amonaren bertsoen urte, doinu eta txapelketa berekoa da bertsoaldia.