Egun, dezente erabiltzen da -t(z)e alde(ra) forma, Euskararen Gramatikak helburuzko perpausak eratzekoen artean sailkatzen duena; egungo diskurtsoan, adlatiboa atzetik duela ageri ohi da gehienean. Adb.:
- “Antzezlan erreala egite aldera, benetako arazoak planteatu ditugu obran”.
Adlatiborik batere gabe ere erabili daiteke, ordea. Hizkera mintzatua islatuz San Martinek idatzitako lanean, esaterako, badira gramatika berriak biltzen dituen adibide bi:
- “Berari laguntze alde, serenoa bere (ere bizkaieraz) hasi zen duro bila”.
- “Pernandori adarra jotze alde, hasi zen kantuan”.
Partizipioarekin (-tu alde) erabiltzea ere zuzena da Euskararen Gramatikaren arabera, nahiz oso bakan agertu. Behean duzue Patziku Perurenaren Koloreak “Orixe”ren begian idazlanetik ateratako lagin bat:
- “Ondoren, berarekin ezkondu alde, Erregeren alaba gaixoa sendatu nahi duten hiru mutilen ipuineko aurrena” (Patziku Perurena, 1992, 437. or.)
Hortaz, testuetan, eskuarki, forma hau adlatiboa atzetik duela topatuagatik, ez dezagun ahaztu aldaera murritzagoak ere badituela eta horiek ere zuzenak jo behar direla.
Informazio osagarria:
Gramatika Batzordea. Euskaltzaindia. (2021). Euskararen Gramatika (1690-91. or.)