Hizkuntz kontuak

Euskaltzaindiaren Hiztegiko hitz berriak hizpide

Euskaltzaindiaren Hiztegiko hitz berriak hizpide

by Ainara Maya Urroz -
Number of replies: 3

Euskaltzaindiak, oraindik orain, bere hiztegian 211 sarrera berri onartu ditu, eta horietatik 118 dira azpisarrera. Guztira 329 forma berri. Gaur egun, beraz, Euskaltzaindiaren Hiztegiak 49.596 forma ditu guztira.

Azken sei hilabeteotan hitz ugari gehitu zaizkio hiztegiari, eta horien artean HABEn erabiltzen diren zenbait hitz daude, aurretik ez zeudenak: sekuentziazio, autoebaluazio, online, ponentzia, podcast, elkarreragin, aintzatetsi.

Azpisarrera berrien artean ere badira berrikuntzak; esaterako, arrisku(-)egoera, haur(-)eskola, orri(-)bazter, foru(-)zuzenbide.

Hiztegian zeuden beste hitz batzuk kendu dira, hala nola babespe; eta bestalde, akademiak txoritxo, herritxo, txakurtxo, kutxatxo, lantxo eta liburutxo  bezalako hitzak onartu ditu, –txo atzizki txikigarriaz osatutakoak.

Horiez gain, hiztegian honako hauek ere sartu dira, euskara idatzian berez tradizio luzerik ez duten hitzak, adib. biziraun, edo bestela, lehendik ere hiztegi batuan dauden (larritu, erantzukizuna bere gain hartu, multzo, biribildu) hitzen sinonimoak: apuratu, asumitu, ekipo, borobildu.

Hurrengo eguneraketan, beharbada, HABEn nahiz beste erakunde batzuetan aspalditik erabiltzen dugun ‘atzeraelikadura’ onartuko al dute?

euskaltzaindia



BESTELAKO INFORMAZIO INTERESGARRIA:

Rey Gorraiz, U. (2022. Urtarrilaren 13a). Txikitero', 'ibuprofeno' eta 'biziraun', Euskaltzaindiak onartu berri dituen hitzen artean. BERRIA. https://www.berria.eus/albisteak/208296/txikitero-ibuprofeno-eta-biziraun-euskaltzaindiak-onartu-berri-dituen-hitzen-artean.htm



In reply to Ainara Maya Urroz

Er: Euskaltzaindiaren Hiztegiko hitz berriak hizpide

by Iñaki Murua -
Atzeraelikadura dela eta, aspaldi HABEn aritu zen Boni Urkizuk proposatu zigun feedback edo retroalimentaciónen pareko gisa. Geurean baliatzen dugu, bai, baina oraindik Euskaltzaindiak ez du jaso; bai, ordea, feedback eta berrelikadura.
In reply to Iñaki Murua

Er: Euskaltzaindiaren Hiztegiko hitz berriak hizpide

by Ainara Maya Urroz -
Beste erakunde batzuek (UEU, MONDRAGON UNIBERTSITATEA...) erabiltzen dute termino hori, eta esango nuke euskal gizartean ere nahikoa zabaldua dagoela hitz horren erabilera,'feedback' maileguzko hitzaren ordain gisa, eta beste hiztegi batzuetan ere onartua dago, hala nola Euskalterm-en edota Elhuyar-en.
In reply to Ainara Maya Urroz

Er: Euskaltzaindiaren Hiztegiko hitz berriak hizpide

by Iñaki Villoslada -

Euskaltzaindiaren Hiztegia hiztegi orokorra da eta Euskalterm terminologia banku publikoa. Termino bat Euskaltermen azaltzen denean 4 eu markarekin Terminologia Batzordean onartutako eta aholkaturiko terminoa da. Atzeraelikadura Merkataritza eta Marketina hiztegian azaldu zen 2015. urtean, beraz, Terminologia Batzordean onartutako hiztegi batean eta, ondorioz, batzorde horrek aholkatzen duen terminologiako hitza da. Batzorde hori Euskararen Aholku Batzordeko atal berezia da, eta EABko kideen artean euskaltzainburua dago eta HABEko zuzendaria bera ere (oker ez banago).

Ondorioa zera da: feedback azaltzen da hitz gisa Hiztegi Batuan, hitz orokor gisa. Atzeraelikadura azaltzen da Euskaltermen termino gisa. Biek dituzte guztizko bedeinkapena eta eta onarpena. HABEn  sortu beharreko dokumentu zein argitalpenetan termino gisa atzeraelikadura erabil dezakegu eta, gainera, aholkatzekoa da hura erabiltzea, hots, terminologia onartua da.