Didakteka

Proba / Froga

Argitaratua: osteguna, 2015(e)ko azaroaren 26(e)an, 09:46(e)tan
Alex Mungia

Sarri nahasten dira bi hitz horiek.

FROGA. Zerbait egia dela finkatzeko edo egiaztatzeko balio duena. 'Proba' hitzak, berriz, hainbat esanahi ditu.

  1. Etsamina, azterketa. Adb.: Euskara-proba.
  2. Dema (herri-kiroletan), norgehiagoka, lehiaketa, indar-neurtzea. Adb.: Idi-probak.
  3.  Inprimatze-lanaren kopia, hutsak zuzentzeko ateratzen dena. Adb.: Aldizkariaren lehen probak. (Aldizkariaren lehen frogak).
  4. Esperimentua, saioa, saiakuntza (laborategian eta abarretan). Adb.: Laborategiko proba bereziek erakusten dute.

Okerrak dira, beraz, adibide hauek:

  • DNA froga egingo diote. (DNA proba)
  • Froga idatzia gainditu dutenen zerrenda. (Proba idatzia)
  • Bihar izango da atari-froga.(Atari-proba)
  • Matematika-froga (Matematika-proba)

Beraz, esanahi desberdina dute 'frogatu' eta 'probatu' aditzek. Hona hemen adibide bat:

Herriko bertso-taldea izan daitekeenaren isla: hiru-lau bertsolari on samarrak hogeita hiru-lau urtekoak, bertsogintzan plazaratuak jada eta norainoko bidea egin zezaketen probatu eta frogatu nahi zutenak. (Andoni Egaña, Hogeita bina, 2004)

'Frogatu': froga bidez agerrarazi, demostratu.

Hori datuekin frogatu behar da. (*Hori datuekin probatu behar da.)


 

Informazio osagarria:

Erakutsi iruzkinak