Atal honetan, lexikoaren ñabardurei erreparatuko diegu, eta, horretarako, Joxe Ramon Zubimendik eta Pello Esnalek idatzitako Idazkera-liburuko pasarte bat ekarriko dugu gogora:  hitz markadunak eta marka gabeak ezin daitezke nolanahi erabili bata bestearen ordez. Markarik gabeko hitzak adiera zabalekoak dira, eta  markadunak, aldiz,zehatzago erabili beharrekoak.  

Esate baterako, ume hitza marka gabea da: haurrak, txorikumeak, astakumeak, katakumeak eta abar, denak ume dira. Haur hitza, ordea, markaduna da: emakumeagandik jaiotako umeari bakarrik dagokio, ez besteri. Haur guztiak dira ume, baina ume guztiak ez dira haur.

 

---

Adibide gehiago:

Marka gabea	Markaduna	Markadunaren esanahia
ume, kume	haur	gizakumea
erdara	gaztelania	Espainia eta abarretako erdara
dialekto	euskalki	euskararen dialektoa
Eusko = Euskadiko	euskal	euskarazkoa
presidente	lehendakari	eusko elkarteren baten burua
parlamentu	Legebiltzar	eusko parlamentua
bandera	ikurrin	eusko bandera
egur	zur	lantzeko moduko egurra
hanka	oin	giza zangoaren behereneko zatia
herri	udalerri	herri burujabea: udalduna
hegazti	txori	hegazti txikia

 

---

Informazio osagarria:

Zubimendi, Joxe Ramon eta Esnal, Pello: Idazkera-liburua, Eusko Jaurlaritzaren Argitalpen Zerbitzu Nagusia, Gasteiz, 1993.