Francesc Ferranek hitzaldi bat eman zuen gaztelaniaz 1999an HABEk antolaturik, "Leer: ¡acción!" izenburupean.

Irakurtzeak, hizkuntz kodea ezagutzeaz gain, irakurprozesua eraginkor bihurtuko duten estrategia batzuk menderatzea eskatzen du. Prozesu horretako atal dira, lerro artean irakurtzen jakitea, testua interpretatzea, informazioa inferitzea, informazio esplizitua eta inplizitua ulertzea, informazioari aurre hartzea, etab. Irakurle onaren ezaugarri diren gaitasun horiek lortuz gero, irakurtzea malguagoa eta azkarragoa izaten da.

Bideo honetan, hitzaldi osoa duzue entzungai.

Montserrat Vilàk hitzaldi bat eman zuen 2012an HABEk antolatutako Ikastaroen barruan, "La interrelación entre comprensión y expresión oral: la lectura pública como actividad comunicativa" izenburupean.

Hitzaldi honek ideia hau du abiapuntu: ahozko ulermena eta adierazpena elkarrekin erlazionaturik daudela, eta elkarren osagarri direla. Bestalde, hitzaldiak bi helburu ditu. Alde batetik, ikasleek ahozko eta idatzizko ulermenean dituzten zailtasunik ohikoenak (linguistikoak, kulturalak, diskurtsiboak…) aztertu nahi ditu; eta, beste alde batetik, ahots gorako irakurketa balio komunikatibodun jardueratzat duten eta testuak ulertzeko eta jendaurrean irakurtzeko orduan eragina duten estrategia metodologikoen gaineko hausnarketa egin nahi du.

Bideo honetan, hitzaldi osoa duzue entzungai.