Didakteka

Zehar

Argitaratua: asteazkena, 2016(e)ko urtarrilaren 27(e)an, 11:52(e)tan
Alex Mungia

Hiztegi Batuan jasota daude -n zehar eta -tik zehar postposizioak. Okerra da, aldiz, -en zehar.

  • Itsasoan zehar ibili
  • Frantziatik zehar doakizu eskutitza
  • *Kalearen zehar

Ñabardura bat eransten dio ZEHAR postposizioak NON kasuko hitzari, leku- edo denbora-tarte baten barruko bilakaerari dagokiona.

Gaur egun, behar ez denean ere erabiltzen da -n zehar; segur aski, a través de gaztelaniazko moldearen eraginez. Tradizioan, nagusiki, tokiari lotua dago zehar postposizioa.

Hortaz, esaldia alferrik luzatzen badu, hobe da kentzea.

  • *Goizean zehar ez dut lanik egin [e.] Goizean ez dut lanik egin
  • *Bi irteera egiten ditugu ikasturtean zehar [e.] Bi irteera egiten ditugu ikasturtean.
  • *Gurasoekin bizi izan zen bere bizitzan zehar [e.] Gurasoekin bizi izan zen bere bizitza osoan.
  • *Liburuan zehar maiz agertzen da pertsonaia [e.] Liburuan maiz agertzen da pertsonaia


Gehiago sakontzeko:

  1. Euskaltzaindiaren Hiztegi Batua
  2. BERRIAren Estilo-liburua
  3. Hauta Lanerako Euskal Hiztegia
  4. EHU
  5. IVAP (2000), Zalantza-dantza (2000): 58-59.
  6. Garate, G (1998), "Erdarakadak”. Bilbo: Gero-Mensajero, 305-306.
Erakutsi iruzkinak