Neoloteka UZEIk abian jarritako egitasmoa da, euskarazko neologismoak (hitz eta esamolde berriak) identifikatu, bildu, aztertu eta sarean jendearen eskura jartzeko. Euskararen normalizazio-prozesuan, ezinbestekoa da lexiko berria zaintzea eta garatzea, errealitate berriak izendatzeko. 

Egitasmo hau beste hizkuntza batzuetako neologismoen behatokien ildotik sortu da, eta bertan jasotzen diren formak oraindik Euskaltzaindiaren Hiztegian (2016ko bertsioa) ageri ez direnak izango dira, nahiz eta batzuetan hiztegi lexikografikoetan ager daitezkeen. 

Neolotekak 50 neologismo ditu abiapuntuan, eta hilero 20 berri gehitzeko asmoa dago. Neologismoak biltzeko, hainbat komunikabidetako (Argia, Berria, EITB, Goiena) edukiak aztertzen dira etengabe, eta urtero hitz-sorta bat hautatzen da hedabideetan arakatuz.  

Nahi izanez gero, norbanakoak ere ekarpenak egin ditzake formulario bat betez.  

Azkenaldian argitaratutako neologismo batzuk honako hauek dira: geomintz, desaurreztu edo ghettizazio. Hitz berri bakoitzak bere definizioa eta testuingurua du, baita gaztelaniazko, frantsesezko eta ingelesezko bere baliokidea ere.