Euskara eta genero-berdintasunari buruzko ikerlanak egiteko bekak 2022 (Berdintzen)

Argitaratua: Thursday, 24 February 2022, 12:59 PM
Berdintzen bekak

 Euskara eta genero-berdintasunari buruzko ikerlalanak egiteko beka-deialdia eman du argitara Eusko Jaurlaritzako Kultura eta Hizkuntza Politika Sailak (Berdintzen 2022 beka-deialdia). Guztira lau beka izango dira, bakoitza 7.500 eurokoa (programak 30.000 euroko aurrekontua du). Eskabideak aurkezteko epea 2022ko martxoaren 25era arte egongo zabalik. 

Esleituko diren beken ikerketa-gaiak honako hauek izango dira:

  • Euskararen biziberritze-prozesuak generoari lotuta ulertzeko ikerketa teoriko edo-eta metodologiko demolinguistikoak.
  • Generoaren ikuspegia txertatuz eraikitzen diren euskararen biziberritze-prozesuei buruzko ikerketa aplikatuak.
  • Generoa eta hizkuntza uztartzen dituzten corpus, komunikazio edo-eta diskurtso azterketak eremu ezberdinetan (hezkuntza, lan mundua, familia, aisialdia eta kirola…).
  • Euskararen biziberritzean emakumeek izan duten paperari buruzko ikerketa lanak (ahozko ondarea baliatuz edo-eta ikerketa bibliografikoak eginez).

Beken xedearen ondoriozko lanak euskaraz egingo dira. Eskatzaileak pertsona fisikoak izan behar dira, banaka edo taldeka. Hautaketa-Batzorde batek baloratuko ditu eskaerak eta Hizkuntza Politikarako Sailburuordeak ebazpen-adierazia emango du. Bederatzi hilabete iraungo ditu bekak, deialdiaren ebazpena jakinarazten duen unetik aurrera; edonola ere, ezingo da epe hori luzatu 2023ko urtarriletik aurrera. 

Erreferentzia

AGINDUA, 2022ko otsailaren 9koa, Kultura eta Hizkuntza Politikako sailburuarena, 2022an euskara eta genero berdintasunari buruzko ikerlanak egiteko lau bekatarako deialdia arautzen eta onartzen duena (2022ko otsailaren 24ko EHAA)