Irakurri artikulua eta aukeratu erantzun egokia

Irakurri artikulua, eta markatu irakurle batek ondo jaso dituen ideiak.

ZORTZI MOTXILA BETE LIBURU

Finala amaituta, eta amaitu aurretik ere, entzuleriari buruzko kritika dezente jaurti dira, itxuraz Amets Arzallusen alde lerratuegi azaldu zirelako; eta, han-hemen, hooligan hitza ere entzun izan dut finaleko ikusleei buruz aritzeko. Uler dezaket bertsolarientzat, batez ere Amets Arzallus ez diren beste zazpientzat, zaila izan daitekeela egoera, baina ez dut ulertzen hooligan taldea kakazteko hainbat kritikariren tema, aspaldikoa baita bertsogintza kultur jarduera kirol-jarduera bilakatzeko tema, bai Elkartearen aldetik bai bertsolarien eta kritikarien partetik.

Roland Barthesek zioen beharrezkoa dela, obra bat epaitzeko, obra eta egilea bereiztea, hots, testua huts-hutsean hartu behar zela, egilea, hartzailea, egoera eta garaiak kontuan hartu gabe. Baina uste nuen teoria horiek iraganekoak zirela. Nola uler liteke bertsoa bertsolariarengandik aparte? Bertsoa, izan ere, ez da ahozko hitz- eta kontzeptu-konbinazio soila, eta ezin da bereizi konbinazio mirarizko hori konbinazioaren egilearengandik (ez eta hartzailearengandik ere). Bertsoa bertsolariaren ahotik heltzen zaigu, baita bertsolariaren nortasunetik (motxila horretan badute lekua hainbat ezaugarrik: generoa, janzkera, geografia, ideologia, jarrera...) eta nortasun horrek eragiten dizkigun sentimenduetatik ere. Ez hori bakarrik: entzuleak, bertsolariarekiko enpatiaren edo antipatiaren arabera ez ezik, haren biografi aren arabera ere epaituko du bertsoaldia, bere gustuei (estetikoak, pertsonalak, ideologikoak, geografikoak, biografikoak, etab.) jarraiki. Uste dut komunikazioa-edo esaten zaiola horri, eta hori, nire ustez, ez litzateke zigortu behar.

Beste gauza bat da bertsolari batzuen komunikazio-gaitasuna ertz soziologikotik hartuta aztertzea, bertsogintzaren fenomenoa abiapuntu hartuta bertso-jarduna bertsolari bakoitzaren profilarekin, garaiko jendartearekin, bertsoak sortu diren garai historikoarekin eta humus politikoarekin harremanetan jarrita ebaluatzea; uste dut publikoaren olatuak kriminalizatzea baino interesgarriagoa eta aberatsagoa litzatekeela.

Eider Rodriguez, bertsolari.eus (moldatua)

* Dokumentua jaitsi, bete eta bidal dezakezu, edo besterik gabe, argazkia egin ariketa osatuari (liburua) eta hura bidali irakasleari.