Paula Elosua psikometrian katedradun agiriduna da. Euskal Herriko Unibertsitatean eginiko psikologiako formakuntza, Madrilgo Conplutense Unibertsitatean buruturiko estatistika-ikasketekin osatzeaz gain, hainbat egonaldi egin ditu, irakasle-gonbidatu gisa, Holandan, Estatu Batuetan eta Kanadan. Egun, proben bidezko ebaluazioaren esparruan itzal handieneko International Test Commission (ITC) erakundearen idazkari nagusia da.

Elosua irakasleak Begi-bistakotik haratago hitzaldian eremu urriko hizkuntzak biziberritzeko lurraldeetan, gizarte- zein politika-mailan hizpide den hizkuntza gutxituan komunikatzeko konpetentzia nola aitortzen den landu du. Izan ere, herritarren ama-hizkuntza edozein dela ere, komunikazio-konpetentzia egiaztatzearen ondorioak garrantzitsuak izan daitezke hainbat egoeratan.

Komunikazio-konpetentzia egiaztatzeko berariazko probak erabiltzen dira, eta gure esparruan horiek sortzeko Europako Erreferentzia Markoak zenbait gidalerro eskaintzen dizkigu. Markoak, ezinbestean, gutxienezko eskakizunak aipatzen ditu, oinarri sendo batek bakarrik bermatuko baititu egiaztatze-probak egokiak direla eta kalifikazioek alborapenik ez dutela.

Eskakizun eta baldintza horiek, ordea, ez dira berriak, psikometriatik datoz; psikometria baita gizarte- eta osasun-zientzietan (Hezkuntza, Psikologia, Linguistika, Medikuntza...) neurketa-tresnen kalitateaz arduratzen den jakintza-arloa. Psikometriaren laguntzarekin frogatu eta bermatu dezakegu egiaztatze-proben emaitzek ongi eta zuzen islatzen dutela hizkuntza hitzegitetik haratago doana: komunikazio-konpetentzia.