HOBEren proba pilotuaren xehetasunak

Argitaratua: asteartea, 25 ekaina 2019, 10:58
    • Bisitak: 1276
    • Iruzkinak: 0
    • Gogokoak: 0

    HOBE proiektuaren proba pilotua:

    Etorkizunean azterketak ordenagailu bidez egiteko proiektu bat abiarazi dugu HABEn, eta proiektu horri HOBE (HABEren Ordenagailu Bidezko Egiaztatzegintza) izena jarri diogu. Proiektuaren hastapenetan gaude oraindik, eta, lehendabiziko mugarri gisa, proba pilotu bat egingo dugu 2019ko deialdi irekian, B2 mailako zenbait azterketarirekin; hala, benetako ingurune batean testatuko dugu HOBE sistema.

    HOBE sistemarekin, ikasleek, etorkizunean, azterketa egiteko eguna, ordua eta tokia aukeratu ahal izango dute. Hortaz, gaude HOBEk onura handiak ekarriko dituela ikasleentzat. Horietariko bat da azterketa ordenagailu bidez egitea:

    • Irakurmen-proba: Irakurgaia ordenagailuan irakurri eta erantzunak ordenagailuan bertan hautatuz.
    • Entzumen-proba: Entzungaia aurikularrekin entzun eta erantzunak ordenagailuan bertan hautatuz.
    • Idazmen-proba: Idazlana teklatu bidez idatziz ("ebaki", "kopiatu" eta "itsatsi" funtzioak erabiltzeko aukerarekin).

    Hiru proba hauek gaindituz gero, mintzamen-proba aurrez aurre egingo da ohi bezala.

    Jarraian, HOBEren bideo-demo bat duzu ikusgai, B2 mailako esperientzia pilotuan erabiliko den sistema nolakoa izango den ikus dezazun. Ikusi bideoa eta entzun adi jarraibideak.